Dabaw maghatag ug P5m sa Marawi

Maghatag ug hinabang nga 5 ka milyones pesos ang lokal nga panggamhanan sa Dakbayan sa Davao alang sa Marawi City.

Sumala ni Mayor Sara Duterte-Carpio nga adunay dakong pundo ang dakbayan sa disaster hinungdan nga p’wede kining makapaambit ngadto sa Marawi.

Dugang pa nga katungdanan kini isip Davaoeño nga mohatag sa mga kaigsoonan nga biktima sa giyera. Giawhag sab sa Mayor ang uban pang lokal nga government units nga mupaambit ang ilang grasya.

Dugang pa nga kung ang tanan maghatag bisan sa ginagmay nga kantidad, dako na kining tabang.

Kalabot niini, giaprubahan niadtong Nobyembre 7 sa mga konsehales sa syudad sa Dabaw atol sa regular session sa konseho ang naasoy’ng kantidad.

Sumala ni Councilor Danny Dayanghirang nga giaprubahan gilayon nila ang maong pundo sa walay paglangan, tungod nasabtan sa mga konsehales nganung buot sa Mayor nga magdunol ug hinabang sa Marawi. Sumala pa nga ang kwarta gikuha sa Quick Response Fund.

Dugang ni Dayanghirang nga dili angayang mabalaka ang mga Davaoeno nga nakuhaan ang pundo tungod aduna pay nahabilin nga P91 milyon ang pundo alang sa tuig 2017.

Kahinumduman nga miulbo ang gyera nga milungtad sa 5 ka bulan sa Marawi City tungod sa pagpangatake sa mga teroristang ISIS-Maute. Dili muubos sa 700 ang namatay sa mga terorista, 152 nga nalagas sa gobyerno, 39 ang namatay nga sibilyan, libuang pamilya ang nawad-an sa kabtangan ingon man pinuy-anan.