San Antonio de Padua Parish BCBP Mercy Mission

“Nia mi kay gusto namo pahimuslan ang tabang nila. Pobre man mi maong moanhi mi niining medical mission aron matambalan. Pasalamat mi nila para sa mga higayon sama niini,” matud pa sa mag-tiayon nga senior citizens nga sila Guillermo, 72, ug Catalina, 71, nga dungan miabot sa Mercy Mission nga gipahigayon sa Parokya sa San Antonio de Padua, di pa lamang madugay. Sakay sa wheel chair si Catalina nga gitulod sa iyang bana. Apil sila sa mga una nga miabot.

Giuban sa ilang mga ginikanan ang ilang mga bata aron usab patambalan. “Daghan kaayong salamat”, ingon ni Nonelyn, inahan, “kay matambalan na gyud ang talipaso sa akong baby.” Tibuok nawong ang nalukop sa mga samad-samad, maong mapasalamaton gayud siya sa maong higayon nga gihatag sa Brotherhood of Christian Businessmen and Professionals.

Dental ug optical check-up, de-worming, paghatag og groceries ang apil nga gihatag sa mga volunteer doctors and staff sa BCBP. Samtang nagapadayon ang check-up, gipakaon usab ang mga pasyente og lugaw ug itlog. Nalipay ang mga bata kay nakadawat usab sila og mga tsinelas.

Ang BCBP baynte-singko na ka tuig nga naga-alagad sa mga katawhan. Usa o duha ka higayon sa usa ka tuig sila nagapahigayon sa maong Mercy Mission. Usa kini sa mga laykong organisasyon sa Arkidayosis sa Dabaw. (Elena Mozo | SAP SoCCom)