GKK SoCCom gitudlo ug gipanalanginan

Diha sa documento sa Vaticano II nga ‘Inter Mirifica’ mahitungod sa Social Communication gihatan ug pagdayeg ang talagsaong nadiskubrehan gamit ang teknolohiya nga nag-abli sa mga bag-ong pamaagi sa komunikasyon nga napahimuslan sa tibuok kalibutan.

Naghatag kini og pag-uswag sa Simbahan diha sa natad sa iyang misyon nga mao ang pagsangyaw sa Ebanghelyo ug pagmantala sa Maayong Balita sa kaluwasan. Busa, opisyal nga gitudlo ug gipanalanginan ang Social Communications Committee sa tagsa-tagsa nga Gagmay’ng Kristohanong Katilingban sa St. Mary of the Perpetual Rosary Parish.

Gisaksihan sa mga parokyano ang pagtudlo ug pagpanalangin sa setenta (70) ka mga pangulo ug miyembro sa SoCCom. Gipahigayon kini sulod sa Santos nga Misa niadtong Oktubre 29 nga gipangulohan ni si Fr. Jess Samaniego. Mitugyan sila sa ilang kaugalingon diha sa pagpangalagad sa tagsa-tagsa nila nga GKK.

Una gipanalanginan sa kura paroko ang SoCCom, gipahinumduman sila sa mga katungdanan ug buluhaton isip SoCCom diha sa ilang tagsa-tagsa nga GKK. (Hermie Mapute | SMPRP SoCCom)