Oktubre, Bulan sa Rosaryo: Imahe ni Maria, Gisuroy

Ang bulan sa Oktubre mao ang Bulan sa Rosaryo. Agi ug pagsaulog niini, ang Gagmay’ng Kristohanong Katilingban sa San Vicente Ferrer sa Subasta nga sakop sa parokya sa San Francisco de Asis Parish-Tagakpan, nagpahigayon ug pagsuroy sa imahe sa Mahal na Birhen Maria.

Kining tinuig nga tradisyon gipangulohan sa mga Pangulo sa Panudlo (PSP) o mga katekista nga sila Estelita Patulilic, Herminia Geoca ug Joey Villaflor kauban usab ang mga PSA nga si Marilou Datuin lakip ang tanang pangulo ug miyembro sa GKK.

Ang maong aktibidades nagpakita sa tanang miyembro sa ilang debosyon sa Mahal na Birhen Maria diha sa pagrosaryo matag adlaw sa ilang tagsa tagsa ka panimalay isip pagdayeg, pagpasidungog, ug pagpasalamat kay Birhen Maria nga Inahan sa atong Ginoong Jesus.

Matud pa sa PSK nga si Cornelio Casalta, ang pagsuroy sa imahe sa Birhen Maria gihimo nga duha ka grupo aron mahatagan ug igong panahon ang tanang miyembro nga boot mabisita sa imahe ang ilang mga panimalay. Sa matag adlaw sa Oktubre, lahi-lahi nga mga pamilya ang mabisita sa imahe ni Maria.

Tumong sa maong Marian Activity ang paghiusa sa matag miyembro sa GKK subay sa tema karong Year of the Parish as Communion of Communities diha sa pag-ampo ug pagdebosyon sa Mahal nga Birhen Maria sa bulan sa Santos nga Rosaryo. (Emma Goles | SFDA SoCCom)