Pro-Life Testimony sa usa ka Katekista

Introduction: Kini nga testimonya gisulat ni Jonilita human namo gipahigayon ang Pro-Life Talk didto sa Lanao Kuran, Arakan, North Cotabato diin silang duha sa iyang bana niapil niini. Si Jonilita, kanhi akong estudyante sa Vicariate School of Theology sa Lumondao sa San Isidro Labrador Parish niadtong 2010. Buot usab niyang ipaambit ang iyang kasinatian ngadto sa uban. –Nanan Bitang

Ako si Jonilita Capulso, usa ka Katekista, minyo ug adunay tulo ka mga anak. Sa dihang nagsunod-sunod na ang akong mga anak nga babaye, nakadesisyon ko nga mohunong una ug pangalagad sa Simbahan. Miadto ako ug doctor ug nangutana kung unsa’y angay nakong gamiton nga family planning method. Sa laktod nga pagkasulti, nakagamit gyud ko ug pills, samtang 8 months pa ang bata. Bisag mahal ang pills, akong giantus ang kamahal aron dili lang gyud ko masundan kay duha ka bulan pa ang bata, giregla na ako.

Pagbuntis nako sa ikatulo, akong gipaningkamutan nga ipakuha nako ang bata samtang duha ka bulan pa lamang ang akong tiyan. Nakatumar ako ug daghang tambal, mga pait nga tanom, ug mu-ambak ako sa hagdanan aron lang makuha tungod dili pako andam. Maayo gani kay miingon ang akong bana nga dawaton nato kung unsa may gihatag sa Ginoo kanato. Diha-diha dayon, nakabaton ako ug kahayag ug paglaum ug nag-ampo na usab ako nga wala unta’y diperensya ang akong anak. Tuod paggawas sa bata, normal siya. Pero sa dihang nagdako na siya, nag-antus ko sa iyang batasan. Ang kinaiya alampo-on. Tungod niini, nakahinuklog ako nga mao na kini ang akong krus sa kinabuhi tungod sa akong sayop nga desisyon. Sa walo ka bulan nako nga pagtumar ug pills, daw sa ginasunog ang akong konsensya. Kahibalo ako nga sala pero giinom lang gihapon nako.

Miabot ang panahon nga may nagdapit kanako nga mahimong PSKB sa GKK ilawom sa FLA-ProLife. Mitubag ako sa tawag ug miundang ako sa pills ug akong gisunod ang Billings Ovulation Method (BOM) sa Natural Planning.
Usa ako ka “wounded healer.” Salamat sa Ginoo sa grasya sa Natural Family Planning nagmalig-on ang among pagpuyo isip magti-ayon. Ang among sikreto paggamit sa Billings Ovulation Method inubanan sa kanunay nga pag-ampo, pag-rosaryo ug pagpangalagad.

Ang BOM mao kini ang akong gituohan nga tinuod nga Family Planning nga subay sa kabubut-on sa Dios, walay babag sa akong relasyon sa Dios, malinawon akong konsensya, walay gastos, walay side effects. Ang epektibong pagpugong sa kaugalingon mao ang pag-ampo gikan sa Bibliya ug kinasing-kasing nga pag-ampo sa santos nga rosaryo.

Ang akong nakat-unan sa BOM akong gipaambit sa akong igsoon ug mga paryente ug sila usab mibiya sa pills ug migamit sa BOM, ug sila nabuntis ug hilabihan ang ilang kalipay nga nasinati kay ang mga bata nahimugso tungod niini nga natural family planning.

By Nanan Bitang/Contributor