“Panaw-Simbahan duyog ambitay sa kulturanhong katilingban”

40 ka tuig, apan may nabuhat ba ta sa atong mga igsoong lumad? Ginasaulog nato karon, Oktubre 8, 2017 ang ika-40 nga tuig sa Indigenous People’s Sunday kon Domingo alang sa mga lumad.

Sa matag tuig nga kasaulogan, ang Simbahan ug ang katawhang lumad gipakusgan ang panagduyog ug panag-ambitay sa kabulokon sa kultura aron ikapadayag sa kadaghanan ang ilang mga kaalam, kahibalo, kusog, pagtuo ug paghigugma sa yutang kabilin, sa pagpatunhay sa ilang katilingban aron makabarog sila batok sa mga hagit ug lantugi sa pagpanglupig nga nasinatian taliwala sa kapobrehon ug kawalay pagtagad.

“Panaw-Simbahan duyog ambitay sa kulturanhong katilingban,” matud pa ni Amay Cris Aninloy sa iyang pagpamulong sa tema sa tuig sa parokya sa gipahigayon nga Episcopal Commission on Indigenous Peoples-Indigenous People’s Apostolate (ECIP-IP-IPA) Mindanao Regional Assembly didto sa Diocese of Dipolog diin gitambongan sa mga arkidyosesis ug dyosesis sa tibuok Mindanao niadtong Setyembre 19-22. Iyang gipasabot kung unsay kalambigitan sa katawhang lumad sa atong kristohanong katilingban. Kon dunay panagtandi ang Katilingbang lumad ug ang Gagmayng Kristohanong Katilingban kon BEC ubos sa panglantaw sa PCP II.

Si Bishop Jose Cabantan ang obispo sa Malaybalay ug obispo sa ECIP-Mindanao nagkanayon nga ang paghatag ug dakong pagtagad ug pagtahod sa katawhang lumad pinaagi sa pagtabang kanila usa ka kongkretong panig-ingnan sa kahiusahan.

Duyog sa pagsaulog sa Domingo sa mga lumad, mapasalamaton ang mga workers sa IPA sa mga ka-obispohan, kaparian, kamadrehan, mga indibidwal ug mga institusyon nga makanunayon nga nihalad sa ilang kaugalingon sa pagtabang sa mga buhat sa apostolado.

Karong tuiga gisaulog sa Catholic Bishop’s Conference of the Philippines–Episcopal Commission on Indigenous Peoples (CBCP-ECIP) nga kanhi Episcopal Commission on Tribal Filipinos ang ika-40 ka tuig niini gikan sa pagkamugna. (June D. Guadalquiver | Contributor)