“Tulo nalang ka tuig, pari na sila” – Fr. Rene

Espesyal gayud ang Misa nga gisaulog niadtong gabii sa katapusang adlaw sa Setyembre didto sa Kapilya ni Sr. Santiago. Sa gabii naghiusa ang mga lideres ug miyembro sa GKK sa sona uno sa Parokya sa San Antonio de Padua, Agdao, aron sa paghalad sa Misa Pasalamat alang sa walo ka seminarista nga anaa karon diha sa walo ka GKK.

Suot ang ilang mga sotana, ug ang mga Theology 2 seminarians sa St. Francis Xavier Major Seminary sa Catalunan Grande, Davao City, mipaila sa ilang tagsa-tagsa ka kaugalingon ug mihalad ug kanta alang sa katawhan nga malipayon, madasigon, ug supportive nga midawat kanila.

Ang pagtinabangay gayud ang naghimo niining Santos nga Misa nga espesyal alang kanila. Si Fr. Rene Ribac, ang director sa Regional Major Seminary ang nagsaulog sa Misa, nagpahinumdom sa importansya sa pagpaubos aron malikay sa kasuko ug maka-pasuko ug sa pagpaminaw diha sa kasaulogan sa Pulong, dili lang kay tsismis. Naghangyo usab si Fr. Rene sa ilang pag-ampo alang sa mga seminarista aron sila makahuman sa pag-eskwela ug mahimong successful sa kinabuhi.

Mabati ang kamingaw sa ilang mga pamilya apan makita usab ang ilang paningkamot sa pagbuhat sa tanan aron makatubag sa tawag kanila sa Ginoo. “Tulo na lang ka tuig, pari na sila”, busa hangyo nako nga dili pasagdan sa mga GKK ang ilang seminarista. Kay sa niana, daghan silang makat-onan nga makadugang ug makatabang sa ilang pag-eskwela kay sa dili madugay mamahimo na silang pari.

Malinawon nga gisalohan ang panihapon sa mga seminarista, GKK leaders ug sa mga miyembro sa sona uno. (Justin Felicia | SADP SoCCom)