Ika-30 nga kapistahan sa GKK Sta. Teresita gisaulog!

Nagsaulog sa ilang ika-30 ka tuig nga kapistahan ang GKK Sta. Teresita sakop sa Our Mother of Perpetual Help Parish niadtong October 7, 2017. Medyo lahi ang ilang selebrasyon karong tuiga tungod kay ang ilang fiesta mass madungog man sa radyo sa DXGN 89.9 Spirit FM tungod kay awardee man ang ilang GKK sa free coverage sa gihimong “May GSL Directory ka na ba?” contest nga gi-sponsor nila.

Nagsugod ang ilang kalihukan sa fiesta pinaagi sa pagbunyag sa upat (4) ka mga bata. Gilahi ang maong kalihukan tungod kay buot ni Fr. James Narisma CSsR, kura paruko nga tagaan gayud ug importansiya ang “pagbunyag” kay kini usa ka importante nga sakramento nga dawaton sa mga kabataan.

Human sa pagbunyag misunod dayon ang kasaulogan sa “Santos Nga Misa.” Madasigon ang mga nanambong nga miapil sa pagkanta tungod kay kauban nila ang mga miyembro sa rondalya sa parokya. Kani nga grupo gilangkuban sa mga batan-on gikan sa mga lain-laing Gagmayn’ng Kristohanong Katilingban (GKK).

Makadani usab sila tungod kay ang mga vocalists nila mga bata pa. Inspiring usab ang homily ni Fr. James bahin sa kinabuhi ni Sta. Teresita. Matod pa niya “dili na kinahanglan nga mopalit pa ug mga mahal nga pangpaguapa ang kinahanglan lamang mao ang pagsunod sa mga binuhatan ni Sta. Teresita ang pagkamakanunayon nga pagpapuyo sa Ginoo sa atong kinabuhi. Mainspire unta nga mahimong misyonaryo bisan pa sa mga kahuyang sa lawas. Salig lang sa gugma sa Ginoo kay kini makahatag ug kalinaw ug kadasig kanato, makadani sa uban, makapaamgo kanila nga aduna gayud Ginoo. Mohayag na ang imong nawong ug mamahimong pareho sa nawong ni Sta. Teresita, ang pinakagreatest saint of modern times.”

Pag-inambitay sa handa sa pista kauban nila Fr. James, Lucy Losbanez ang parish worker ug mga bisitang lideres sa laing mga kaubang GKK ang misunod human sa Santos nga Misa. Malipayon ug mapasalamaton ang mga GKK Servant Leaders pinanguluhan sa ilang Pangulo sa Katilingban (PSK) Fely Petracorta nga malampuson ang ilang pagsaulog sa ilang kapistahan. Mapasalamaton usab sila sa presensiya sa taga DXGN 89.9 Spirit FM Davao. (Marietta Comighud | OMPH SoCCom)