ECIP Mindanao IP-IPA Regional Assembly

BARCELONA SPRING FARM, DAPITAN CITY
DIOCESE OF DIPOLOG
September 19-22, 2017

PAMAHAYAG
Kami ang mga partisipante sa ECIP Mindanao IP-IPA Regional Assembly nga gipahigayon sa Barcelona Spring Farm Resort, Dapitan City, Zamboanga del Norte niadtong Septyembre 19-22, 2017. Gikan kami sa nagkalain-laing lumadnong katilingban nga gialagaran sa Indigenous Peoples Apostolate (IPA) sa upat (4) ka Archdioceses ug siyam (9) ka Dioceses sa Katolikong Simbahan sa Mindanao. Diha sa among panagbayloay nga gipahanoy sa mga lumilihok sa Catholic Bishops Conference of the Philippines-Episcopal Commission on Indigenous Peoples (CBCP-ECIP) ug linamdagan sa tema nga Panaw–Simbahan: Duyog–Ambitay diha sa Kulturanhong Kinabuhi pinasubay sa Tuig sa Parokya, kami maampoong namalandong sa kahimtang sa mga lumadnong katilingban ug sa apostolado sa Simbahan.

Malipayon kaming nagapasalamat sa Amahan nga ning tuiga mao ang paghinumdum sa mga mosunod nga mahinungdanong kasaulogan diha sa mga paningkamot sa Simbahan uban sa Katawhang Lumad sa Pilipinas:

1. ika-40 nga anibersaryo sa Episcopal Commission on Indigenous Peoples (ECIP);
2. ika–40 na ka tuig nga pagdeklara sa Domingo sa mga Lumad matag ika-duhang Domingo sa bulan sa Oktubre; ug
3. ika-20 ka tuig sa IPRA kon 8371.

Pinasikad sa among pag-inambitay, buot kaming mopadangat ning mosunod ngadto sa:

• Atong panggamhanan, nga ipatuman sa hingpit ang Indigenous Peoples Rights Act (IPRA 1997) kon RA 8371 ug uban pang mga balaod nga alang sa kalamboan sa lumadnong katilingban;
• NCIP (National Commission on Indigenous Peoples), nga mag-tininuod ug mag-kinasingkasing pagpangalagad sa katawhang lumad ug maghupot kanunay og lig-ong baruganan, dignidad ug integridad isip usa ka ahensiya sa gobyerno. Samtang kami mapasalamaton nga gihatagan na og igong pundo ang NCIP, lakip na ang CHR, amo gihapong gipanghinaut nga himoon ning maong ahensya ang husto ug walay usik nga pagdumala sa pundo nga gigahin alang sa pagtuman sa katungdanan nga gitahas kanila sa balaod;
• Kongreso, nga aprubahan na ug ipakanaog ang balaod alang sa sistema sa edukasyon nga nakagamot sa kasaysayan ug kultura sa Katawhang Lumad ug nagapalambo sa ilang lumadnong kaalam, katakus, kalihukan ug spiritwalidad;
• Diyosesis ug parokya, nga mamahimong kabahin sa ilang prayoridad nga programa ug gambalay ug mapalig-on ang Apostolado sa Lumad;
• Tanang hut-ong ug mga pundok sa atong nasud, nga:
  • ipadayon ang matinud-anong pakigduyog sa mga giila sa katilingban nga pangulo – mga tigulang (Elders), Datu, kababayen-an, kabatan-onan – aron abagan ang mga lumad sa ilang paningkamot alang sa kaugalingnan, gawasnong pagkinabuhi ug pagdumala subay sa kultura ug lumadnong kahibalo, sistema, pamaagi ug ispiritwalidad (IKSPS); ug
  • maundang ang pagpamatay sa mga lumad nga nabiktima sa armadong pwersa ug mahatagan sila ug ang ilang pamilya og hustisya.

Sa among kabahin, kami nagabag-o sa among saad sa pakig-uban ug pakig-alayon sa kaigsoonang lumad alang sa katumanan sa ilang gidamgong kaugalingnan kon “self-determination” ug pagdasig kanila nga mahimong aktibong kauban sa paghiusa sa mga katilingban sulod sa parokya ug diha sa pagpangandam sa tibuok Simbahan sa Pilipinas alang sa ika-500 ka tuig nga pagka-Kristyanos sa Pilipinas karong 2021.

Pinirmahan:

Most Rev. Jose A. Cabantan, DD
CBCP-ECIP Vice-Chairperson and
Bishop In-charge ECIP Mindanao