Food Bank for the Poor dakung tabang sa kabus: 50% discount

Alas kwatro mata na siya aron sa pag atiman sa iyang masakiton nga bana. Alas singko, maglugaw na aron adunay makaon ang iyang bana. Alas otso niadtong adlaw’ng Dominggo, nagbaktas na si Nanay Fe Amora, 71 anyos, padulong sa parokya sa San Roque, Malabog, Paquibato District aron sa pagpalit ug bugas, noodle ug tinapa aron ugma puhon makakaon na sab sila.

Singkwenta ka tuig na silang minyo ug alang kang Nanay Amora, sa kahamugaway ug kapit-os, makig duyog siya kang Tatay.

Kini usab ang tumong sa programang Food Bank for the Poor sa naasoy’ng parokya. Ang mga kabus ug hinikawan sa oportunidad sa katilingban mamahimong makapalit sa panginahanglan sa ubos kaayo nga presyo.

Matud pa sa Pangulo sa Alagad Parish Ministry Coordinator Marycris Ebore Deguinion, natukod ang Food Bank for the Poor luyo sa parokya niadtong Marso 20, 2016. “Atol pud kato sa pagsugod sa Alay Kapwa sa Tuig sa Kabus,” sumala niya.

“Ang mga pagkaon sa pagsugod namo daghan kaayong donations, daghang gi-solicitan si Fr. Jojo Ortiz, in-kind or cash. Ang bugas, half price ang beneficiaries. Ang canned goods, tag P7, ang noodles tag P4, ang sugar P6 lang, half price lang gyud. Ang mga beneficiaries mao ang naidentify sa ilang GKK, mga kabus nga parokyano nga wala g’yuy pangita, igo lang sila maghulat ug naay ihatag kanila. Sila tong nagkinahanglan ug trabaho o nanghurnal lang, walay yuta nga ilaha,” dugang ni Deguinion.

Sa pagpili nila, gitahasan ang mga PSA sa pagpangita ug beneficiaries niya gihatag kang Fr. Jojo. Katuyuan sa programa nga matabangan ang mga kabus sa parokya.

Si Nanay Fe usa lamang sa 25 nga benepisyaryo sa maong programa sa kasamtangan. Apan kining ihap gamay lang tungod kay adunay 53 ka GKK ang parokya. “Hinaut daghan pa ang makahatag nga malumong kasingkasing kay daghan pa gayud ang nanginahanglan,” panawagan ni Deguinion.

Sumala pa nga nagtinabangay ang mga PSA aron makapalit ug basic needs o panginahanglanon sa balay ang mga benepisyaryo. Paninda sa Food Bank karon ang bugas nga NFA, liquid soap, noodles, pipila ka canned goods, toyo, suka ug sabon.

Sa pangutana kung nakatabang ba ang programa kanila, si Nanay Amora miingon: “Nakatabang g’yud kay para pakaon sa akoang mister nga dili na kakita ug katindog. Ako s’yang lugawan. Salamat kaayo sa kaubanan nako diri sa komunidad.”

Sa pikas bahin, emosyonal ang 79 ka anyos nga benepisyaryo nga si Donata.

“Nagapalit ko diri ug sabon, bugas, shampoo, mantika, ug uban pa. Lipay kaayo ko kay makatabang siya kay barato g’yud. Wala nakoy makita ingon ana kay katunga ang presyo.” Si Donata, mag uuma. Sa iyang mga anak ra siya nagpuyo karon.

Alang kang Leonardo Nacion, 24 anyos, PSA sa GKK San Isidro Labrador, Zone 4 gipili niya si Nanay Catalina Daligdig isip benepisyaryo tungod, “iyang anak murag magwala usahay, biyudo pud ‘to, n’ya naa pay usa ka apo. Dakung tabang kaayo nang sa Food Bank kay mahal kaayo na (produkto) kung sa gawas paliton.” Sa pagsulod nako isip PSA, wala ko nagpalit. Dili ko mupalit nga dili iyang kwarta. Panawagan nako nga dili lang unta mapul-an ang pari ug donors aron masuportahan ang nanginahanglan ug panabang.”

Alang kang Nanay Catalina, dakung tabang kini kay “sa una among ipalit ug bugas, traynta ang bugas, karon kinse nalang. Magpasalamat ko kay muna muna ning uban sa akoa, maayo ang iyang lawas, ang pari pud kay iya man ning gimugna.”

Giawhag ni Deguinion ang tanan sa pagsuporta sa ilang programa alang sa mga kabus, “hilabi na gayud ang mga katigulangan aron mas daghan pa ang among matabangan. Hinaut daghan pa ang musuporta sa among Food Bank for the Poor para ma sustain ang programa.”

Tataw ang panaghiusa sa parokya pinaagi niining lihok sa Simbahan sa Malabog hilabi na sa pagsaulog sa Tuig sa Parokya. (With report from Imelda Overiz, SRP SoCCom)