5 ka Marka ni St. Francis gipasabot

Ang unang novena alang sa kapistahan sa parokya ni St. Francis of Assisi, La Verna nahitabo niadtong Setyembre 8. Tungod kay naatol kini sa pagsaulog sa adlaw’ng natawhan ni Birhen Maria ug aduna say “Panaw Duaw” sa Parokya, kaadlawon pa lamang ang mga deboto sa Divine Mercy Apostolate mata na aron magsaulog. Mañanita, paghalad sa bulak ug fellowship meal uban sa Kura Paroko Fr. Junar dela Victoria ang nahitabo agi’g pasidungog sa Mahal nga Inahan.

Sa hapon gisugdan ang 1st Day Novena alang sa kapistahan sa Patron. Gisunod gilayon ang Santos nga Misa nga gipangulohan ni Fr. Tony Rosales, OFM, usa ka Fransiscanong pari nga gikan pa sa kaulohan. Gipalawon ang pagpasabot sa stigmatization ni St. Francis pagkahuman sa misa.

Matud pa ni Fr. Rosales 2 ka tuig una namatay si St. Francis naangkon niya ang “Lima ka Samad ni Jesus” o “Stigmata”, usa ka pinulongan nga Griego nga sa ato pa “marka.”

“Ang marka nga nadawat ni St. Francis mao ang tubag sa iyang pag-ampo nga makaambit unta siya sa kasakit ni Kristo nga iyang naagian atol sa paglansang Kaniya sa krus. Iyang nadawat ang 5 ka samad, 2 sa tiil, 2 sa kamot ug 1 sa kilid diin agi kini sa bangkaw Kaniya sa mga sundalo,” sumala niya.

Dugang pa ni Fr. Rosales, si St. Francis mao ang kinaunhang Santo nga nakadawat sa stigmata ni Kristo busa nahimo siyang “Mirror of Christ” o salamin ni Kristo. Busa giawhag ni Fr. Rosales ang mga deboto o magdeboto sa patron nga si St. Francis “nga mag-ampo kita dli lamang sa atong kaugalingon kondili iapil nato ang uban ilabina ang mga nanginahanglan. Iya usab gihangyo ang tanan nga atong gakson ang atong Cross, “ato kining dawaton ug i-ampo inay talikdan”, sumala pa niya. Gipahigayon ang Veneration sa Sacred Relic ni St. Francis ug St. Claire paghuman sa pagpaambit.

Tema sa ikaduhang kapistahan karong adlawa isip parokya sa St. Francis of Assisi, La Verna Hills Subdivision mao, The Stigmatization of St. Francis of Assisi, “San Francisco de Asis: Inspirasyon sa Panaghiusa sa Parokya.” (Sylvia Orbeta | SFAP SoCCom)