Holy Family Parish GSL nagpahitabo ug Assembly ug Team Building

Nagmalampusong gipahigayong assembleya sa mga pangulo sa Holy Family Parish niadtong Agosto 26, 2017 didto sa Mergrande Beach Resort sa Dumoy, Davao City. Kini gitambungan sa dul an 300 ka mga GKK Servant Leaders sa parokya.

Ang panagtigom nagsugod sa alas 8 sa buntag pinaagi sa pagsaulog sa santos nga misa nga gipanguluhan ni Rev. Fr. Ricky Peñalosa, DCD, ang kura paroko. Sa maong misa, gipahimumduman ang tanang servant leaders sa importansya sa panaghiusa ug pagsinabtanay isip miyembro sa parokya nga dunay usa ra ka pagtoo. Iya usab nga giawhag ang mga GSL sa pagpadayon sa pagtubag sa hagit sa pagtukod sa gingharian sa Dios dinhi sa yuta. Matod pa niya, isip GSL kanunay kitang magpaubos sa kaugalingon sa pagpangalagad uban ang pagpas-an sa krus ug ipaila ang mga maayong buhat sa Dios ug likayan ang pagpataas ug pagpaila sa kaugalingon.

Paghuman sa misa, nangandam ang mga partisipante alang sa unang sesyon, ang pagtuki sa Encyclical Letter ni Papa Francisco nga Laudato Si. Kini maayo ug madasigong gipaambit ni Bro. Nitoy Lipumano, usa ka katekistang mag-uuma ug anchor sa programang Agri-ment sa DXGN FM. Iyang gipasabot ang kabililhon sa kinaiyahan isip atong puy-anan. Natuki usab sa maong sesyon ang responsibilidad ug kalambigitan sa usa ka tawo sa iyang palibot busa kini angay atimanon ug ampingan.

Paghuman sa Laudato Si, nisunod usab ang paghisgot mahitungod sa Emergency Preparedness nga gipaambit sa pipila ka miyembro gikan sa San Pablo Parish Risk Reduction Team. Ilang gipakita ginaagi sa video presentation ang mga fault lines nga nahimutang sa Davao Area ug kasikbit pang lugar. Nakahigayon usab sa pagpangutana ang pipila kabahin sa maong isyu.

Paghuman sa gihimong demonstrasyon sa insaktong buhaton panahon sa linog, sunog, baha ug uban pang kalamidad, gisunod ang drill aron mabansay ang mga pamaagi nga nahisgutan. Paghuman sa paniudto, gipaabot sa mga partisipante and team building activity mga maoy pinakatumong sa gihimong panagtapok. Kini dunay tema nga, “One Faith.One Church.One Parish.One Team.”

Sa pagsugod, gipaambit sa facilitator ang 10 tips nga angay buhaton aron magmalampuson sa pagkab-ot ang usa ka team sa matag tumong o hagit. Paghuman, gisunod ang lain-laing aktibidad nga musukod sa abilidad sa matag team. Gipailala nila ang ilang grupo pinaagi sa usa ka creative presentation nga nagpagawas sa managlahing personalidad ug talento. (Flor Deloria | HFP SoCCom)