‘Ang akong balatian himoang panukaran’

Dear KNOT,

Payat. Putla. Wa nay ganang ikaon. Naghulat nalang sa kamatayon.

Mao ni akong unang nabantayan kang CODE BLUE, usa ka Person Living with Human Immunodefiency Virus/AIDS.

Sumala pa sa Department of Health (DOH), ang Davao City usa na karon sa mga lugar diin nagakadaghan ang ihap sa PLHIV.

Nakahimamat ko si CODE BLUE sa dihang gipaila ila siya nako. Sumala niya nga ang HIV, dili lang physical kundi behavioral problem. Kini makuha sa tanan, mapa babae man, lalaki, bayot o tomboy.

Gikulbaan siya human niya nahibaw-an nga namatay ang usa sa iyang nakihilawas nga Norwegian tungod sa HIV. Diha diha dayon siyang nagpa HIV test aron mahibaw-an kung siya pud ba natakdan.

Nadiskubre niya human sa usa ka bulan nga siya pud usa na ka HIV carrier. Nahadlok siya tungod kay nasayod siya nga usa sa atakihon sa iyang lawas mao ang iyang anti-virus. Bisan gani sip-on, dali ra siya matakdan.

Busa nahuna hunaan nalang niya nga unahan na lang iyang kamatayon pinaagi sa pag suicide. Apan, sa pamalandong, iya na hinuong nakita ang kaimportante sa iyang kinabuhi.

Si CODE BLUE, bag o pa man nagluya, usa ka aktibong batan-ong lider sa ilang kapilya. Daku ang iyang impluwensiya. Layo na sad ang iyang naabtan. Nahimo pa man gani siyang exchange student sa abroad.

Karon, dili ikalimod nahadlok sa siya sa mga tao. Gani wala jud niya gipahibalo iyang ginikanan sa iyang kahimtang. Apan, kini karon nagpaduol kaniya sa simbahan.

Nagatambong siya sa misa kung mahimo matag adlaw hilabi na sa Domingo ug sa ika-13 sa bulan.

Kini usa sa pagsunod sa saad nga gisulti ni Mama Maria sa Fatima nga kun si kinsa man ang mutambong ug misa matag ika-13 sa bulan sugod Mayo hangtod Oktobre niining tuiga, makakuha ug plenary indulgence [Plenary indulgence – Code of Canon Law (can. 992) Catechism of the Catholic Church (n. 1471): “An indulgence is a remission before God of the temporal punishment due to sins…). Kinahanglan ang matag magtutuo magbuhat sa tulo ka rekwisitos: 1. Pagtambong sa Misa ug pagdawat sa komunyon, 2. Pag-offer sa intensiyon sa Santo Papa, ug 3. Pagpangumpisal (sulod sa 8 ka adlaw human sa ika-13 sa bulan).

Sumala pa sa HIV carrier iya na kining mahuman sunod bulan sa Oktubre. Kasamtangan pud siyang nagabisita sa adoration chapel aron makig istorya sa Ginoo. Pinaagi niini siya nagahangyo sa Ginoo nga siya mapasaylo sa sala nga iyang nabuhat. Nagatambong pud siya sa first Friday ug Saturday nga misa. Nakapangumpisal na pud siya.

Nabantayan sab nako nga nagasul-ob na siya ug Brown Scapular sa Mt. Carmel. Akong nahibaw-an nga usa siya sa na-enroll niadtong pagbisita sa Our Lady of Fatima dinhi sa Dabaw. Sumala sa saad ni Maria nga nakapatik sa scapular, dili itambog sa impyerno ang si kinsa mang magsul-ob sa scapular.

Tinuod usa kini ka behavioral problem, matud niya apan bisan dunay mga higayon nga siya matintal apan kinahanglan niyang pugngan aron dili siya makatakod sa uban. Kini ang pinakagamay niyang mabuhat, apan dunay dakong responsibilidad.

Daghan pa ang HIV carrier sa Davao City. Lisod kini nga kahimtang nga si bisan kinsa maglisod ug dawat sa maong kahimtang.

“Sagrado ang pakighilawas. Dili siya dapat itudlo nga okay lang basta dapat naa siyay proteksyon sama sa condom, kay ang resulta ana kay ako. Nahimo siyang praktikal sa akua kay mao nay ginadikta sa katilingban karon. Apan mahimo unta kining panukaran niining akong kasinatian, hilabi na sa mga gawi nga dili haum.”

Sumala pa sa usa ka palabas, “with great power comes great responsibility,” ato untang makuhaan ug lesson ang nahitabo kang CODE BLUE.

Panawagan niya sa Simbahan, “sa iyang pagtan-aw, espirituhanong paggiya sa nagkagrabe nga ihap hilabi na sa yanong batan-on. Ginaampo nako Ginoo, dili pa nako gustong mamatay, kining akong gibitbit nga sakit mahimong panukaran, kung itugot nga hatagan pa ako sa nagatugyan ako nimo sa akong tibuok nga kinabuhi, ang tanang oras ug panahon, Ikaw ang mamahimong desisyon sa akong kinabuhi.” – Joseph Nichols Magdaherin