50th fiesta sa San Nicolas de Tolentino GKK

Andam na ang GKK servant leaders ug mga miyembro sa katilingban sa San Nicolas de Tolentino, Buhangin alang sa ika-50 ka tuig nga kapistahan sa Patron nga si Sr. San Nicolas de Tolentino.

Tungod niini gipahigayon ang pre-fiesta general assembly sa GKK San Nicolas de Tolentino niadtong Agosto 5, 2017 nga gitambongan sa GKK Servant Leaders, miyembro sa katilingban ug Parish Pastoral Team.

Sa maong asembliya gipahibalo sa PSK nga si Fe Ibañez sa katilingban ang mahitungod sa mga nahitabo sa niaging pista, mga kaayohan, kalisdanan nga nasinati sa GKK sulod sa usa ka tuig ug mga nag-unang panginahanglan sa katilingban.

Dugang gipahibalo sa PSK ang mga nakahan-ay nga mga kalihukan sama sa Novena Mass nga nagsugod sa August 31, 2017 hangtud September 8, 2017, Zumba for a Cause ug social services sama sa Legal Assistance ug Medical Mission.

Tema sa maong kasaulogan: “Katilingban nga Nagkahiusa aron sa Pagsangyaw sa Ebanghelyo uban sa Gugma ug Pagpalambo sa Kristohanong Kinabuhi diha sa Parokya”.

Ang Santos nga Misa saulogon sa September 9, 2017 sa alas 7:00 sa buntag nga pangulohan ni Arsobispo Romulo G. Valles, D.D. kauban ang Kura Paroko nga si Fr. Jess Samaniego. Inigkahuman sa Santos nga Misa adunay pagahimoon nga fellowship lunch, mga padula alang sa mga kabataan sama sa parlor games ug videoke challenge. Pagka gabii mao ang Pageant Search for Ms. Teen San Nicolas.

Sumala pa sa kasaysayan, ang GKK San Nicolas de Tolentino namugna niadtong March 16, 1967 diin kini sakop pa sa laing Parokya. Sa pagtukod sa St. Mary of the Perpetual Rosary Parish sa Buhangin niadtong 1987, usa kini sa mga orihinal nga GKK sakop sa maong Parokya. (Hermie Mapute | SMPR Parish SoCCom | Photo by Annabel Dimaala)