FLA Facilitators’ Training sa St. Joseph Parish, Sasa gipahigayon

Kanunay ang atong Simbahan nag-tawag kanato niining mosunod: “Pagkadaghan sa anihonon apan gamay lamang sa mangangani karon.” Busa, nagpadayon ang pagpangita sa mga magtiayon nga motahan ug mohatag panahon sa pagpangalagad sa Simbahan.

Ang Family and Life Apostolate (FLA), usa ka programa sa Arkidayosis sa Dabaw nga nag-atubang karon og dakung hagit sa pagpreserba sa Sakramento sa Kaminyoon ug sa kinabuhi.

Aron nga matubag kining dakung hagit, ang FLA sa St. Joseph the Worker Parish nagpahigayon og binulan nga seminars sama sa Pre-cana, Amansibado, Marriage Enrichment ug Natural Family Planning–Billings Ovulation Method. Apan kini nanginahanglan pa og dugang lumilihok aron kini mahitabo diha sa Gagmay’ng Kristohanong Katilingban.

Tungod niini gipahigayon ang Facilitators’ Skills Training niadtong Agosto 26–27 diin 9 ka mga magtiayon ang mitubag sa tawag aron sa pagpadayon diha sa mga programa sa pagpalambo sa pamilya.

Human sa ilang practicum, ang Facilitators’ Team nga sila ni Leopoldo Robert Valderosa, Jr., Lilia Aventurado ug Amelita Desquitado mihatag sa ilang katungod sa pagdeklara nga ang siyam ka mga magtiayon kabahin na sa FLA Core group sa maong parokya. Makadawat sila sa Certificate of Recognition nga pirmahan sa FL A Director, Rev. Fr. Orly Angelia. (Amie Desquitado | SJWP SoCCom)