Kaliwat, Ka-GKK

Duha ka libo na ang mga Gagmay’ng Kristohanong Katilingban (GKK) dinhi sa Arkidayosis sa Dabaw. Kada tuig, ang matag usa nagasaulog ug kapistahan base sa matag usa nga kasaysayan. Nobena, prusisyon, misa, kaon, programa, ug mga padula ang kanunay nga apil sa selebrasyon. Ang kapistahan nagpasabot sad sa kahiusahan sa katilingban. Di man magkadugo, apan matag usa, kapamilya.

Pinasahi ang larawan sa GKK San Roque, Cogon, Sirawan, Toril, Davao City.

Literal man gud nga magkadugo ra ang mga opisyal ug miyembro sa GKK. Ang pamilya Licera, Jadraque, Alcebar, Carcueva, Villa, Ojeda, Cardente, Languido, Salazar, Bawin mao ang nagapadayon sa gisugdan sa ilang apohan niadtong 1951.

Matud pa sa GKK SoCCom Carlotte Asilum, pipila lamang sa 90 ka pamilyang nahisakop sa kapilya ang dili paryente. Gikan sa Pangulo sa Katilingban hangtud sa organista adunay koneksyo sa matag usa.

Mabungahon ang ika-66 nga pagsaulog sa sa kapistahan sa naasoy’ng GKK. Sa naandan, isip pasalamat sa abot sa umang natagamtaman, gipangulohan ni Fr. Roy Mejias, ang kura paroko sa Sto. Rosario Parish, Toril ang misa sa buntag niadtong Agosto 18. Misunod dayon ang pakaon ug ang ‘Ginoo at Ginang Cogon 2017’ pagkagabii. Sumala sa PSK Liezel Licera, “gihimo kining aktibidad aron ang mga magtiayon nga niapil mamahimong sumbanan sa mga manan-away.” Sila kuno ang mamahimong larawan sa kahamugaway sa pamilyang kristohanon.

Pagkahuman sa kapistahan, nagtapok ang tanan aron makapahulay. Plano sa GKK “nga unta makapalit na mi ug dako dako nga San Roque statue. Dayon proyekto sad nga makahatag ug piso kada Dominggo sa DXGN,” panapos sa PSK. Ang Misa sa pista gicover sab sa Katolikong radyo sa susamang adlaw.