GSL Assembly sa Holy Family Parish Gipahigayon

Gipahigayon ang asembliya sa mga GKK Servant Leader sa Holy Family Parish niining bulan sa Agosto. Kini gihimo sa Holy Family Parish Social Hall. Ang maong asembleya gipanguluhan ni Mrs. Amy Gentallan, ang PSK coordinator sa parokya.

Nahisgutan sa maong assembleya ang mga umaabot nga aktibidad sama sa GSL Team Building nga ipahigayon karong Agosto 26 sa Mergrande Beach Resort sa Barangay Dumoy. Ang team building magsugod sa usa ka santos nga misa nga panguluhan ni Fr. Ricky Peñalosa, ang kura paroko.

Paghuman sa misa, adunay hamubong pagtuki ug paghisgot sa encylical letter ni Pope Francis nga Laudato Si nga ipaambit ni Bro. Nitoy Lipumano, DXGN anchor person sa programang Agri-ment. Subay sa hisgutanan mahitungod sa kinaiyahan, maghimo usab ug pagpasabot ang pipila ka personahe sa Davao Risk and Reduction Team isip pagpangandam sa mga kalamidad.

Lakip usab sa nahisgutan ang pagpangandam sa umaabot nga kasumaran sa adlaw’ng natawhan ni Fr. Ricky Peñalosa nga pagatambungan sa mga parokyano.Ilang gihisgutan ang tema ug ang mga butang nga angay iandam sa maong aktibidad. Sa maong asembleya, gitunol usab sa GSL sa GKK sa Virgen Del Pilar ang lima ka botelya nga puno sa sinsilyo isip suporta sa mga programa sa DXGN FM. Kini gikalipay sa mga GSL ug nanghinaot nga mudaghan pa gayod ang magpaabot ug suporta alang sa atong Katolikong radyo. (Flor Arellano-Deloria | HFP SoCCom)