Pinaagi sa paglaum kita naluwas

22nd Sunday of Ordinary Time
Jer 20:7-9; Ps 63; Rom 12:1-2; Mt 16:21-27

Ang mga kahilayan karon diha sa atong katilingban, sa atong Nasud ug sa tibuok kalibutan diin ang “awards” o ganti naghimo man hinoon sa mga immoral nga buhat ngadto sa “maayong buhat”.

Ang mga irreligious ug immoral sa atong katilingban karon may purohan nga nagmadaugon sa pagdani sa mga tawo nga bisan supak sa pagtulun-an sa Ginoo ug kini nahimong gidawat sa katilingban, sama pananglit sa kamingyoon tali sa lalaki ug lalaki, babaye ug babaye, sa abortion, sa pills, etc. nga giisip mga moral o maayong buhat.

Ang maong aspeto sa kalibutan dili managlahi sa panahon ni San Agustin (354 AD) sa Tagaste, North African territory sa Roman Empire, now Algeria. Sama sa mga modernong tawo karon, si Agustin nangita sa tawhanong kalipay (pleasure) diha sa mga butang kalibutanon, apan wala gayod siyay katagbawan. Sa lawum niyang pamalandong, iyang nadiskubrehan ang tiunay ug bug-os nga kalipay diha lamang diay sa Simbahan ug sa Ginoo.

Ang pagtubag sa tawag sa Dios dili sayon alang ni Augstin. Iyang nasuta nga pinaagi lamang sa pagkamapaubsanon o pagpaubos sa iyang kaugalingon, ilabi na sa pagpaubos sa iyang Salabutan (Intellect) ug Kabubut-on (Will) ngadto ubos sa Diosnong Kinaadman (Divine Intellect).

Si San Agustin nagsulat mahitungod sa iyang kinabuhi nga gihinganlan og CONFESSIONS. Ang maong basahon maoy atong guiya sa pagsabot mahitungod sa gasa sa GRASYA (Grace). Sayon lamang kon kita modawat lamang sa maong grasya, apan sabton pinaagi sa halawum nga pamalandong nga ang maong pagpanaw (journey) puparehas lang sa panahon ni Agustin ug sa atong ka panahonan karon.

Sa mapaubsanong kasingkasing si Agustin misulat sa iyang CONFESSIONS nga “ANG AMONG KASINGKASING IMONG GIHIMO ALANG LAMANG KANIMO, O GINOO, UG DILI KINI MAGMALINAWON HANGTOD DILI MAKAPAHULAY DIHA KANIMO.” Kini nagpasabot nga ang tanang butang kalibutanon pulos lumalabay lamang. Atong gipangita ang mga kalipay diha sa daw aso o panganod nga lumalabay lamang.

Sa iyang pangatapusang bahin sa CONFESSIONS, si San Agustin nagkanayon nga sa kanunay atong malaktawan o mataligam-an sa pagbasa nga nagkanayon; “DIHA SA PAGLAUM, KITA NALUWAS.” Ang atong PAGLAUM anaa ra gayud sa Dios. Walay lain. Kita kanunay mangandoy sa pagpakighiusa Kaniya. Kon kita kanunay maampoon, nan atong matagamtam ang atong kahiusahan sa presensya sa Dios. Sa ingon dili na kita usa ka Kristiyano ug pagano usab sa samang paagi. i.e., Kristiyano Kita o Pagano pod.

Sa atong pagsimba karong Domingoha, kita mag-ampo sa pag-ingon: “Ginoo, bag-oha ang among mga kasingkasing. Amen.” (Rev. Msgr. Bonie L. Burlaza, FDCD, SThD, HP)