Ang Pagbuot sa Dios

(Ika-3 nga bahin sa 12 ka bahin sa serye)

Sumala pa, ang iligal nga droga, kriminalidad ug korupsyon sa gobiyerno, ug dugang pa niini, ang terorismo, ang mga dagkong problema sa nasud nga nagdala ug kasamok ug kagubot sa katawhan. Dako kaayo nga kadaot ang resulta niining maong problema. Bisan ang kasamtangang administrasyon miangkon nga sa kadako sa problema niini, mahuman na lang ang ilang termino dili pa gayod kini masumpo.

Karon nga gitandog kini ug gipaninguhaan sa gobiyerno nga sulbaron, nabulabog ang mga katilingban, ilabina sa daghan kaayong mga Barangay diin anaa nakagamot ang problema gikan sa mga dagkong tawo hangtod sa mga mayukmok intawon. Daghan na ang mga napatay, gipatay, nadamay nga namatay. Ug labaw pa gayod nga daghan ang mga namatyan. Bata, batan-on hamtong ug tigulang apil, mga dato ug mas daghan, ang mga kabus. Suspetsado pa lang patay lang gihapon. May mga nangamatay sa kamot sa pulis, military ug mga tawong tirador nga walay klaro kon sibilyan ba o pulis lang gihapon.

Nabahin ang publiko. Naay mga nangalipay. Naa pud nangasuko kay nabiktima sila. Naay mga nabalaka sa nagkausbaw, ubos sa kasamtangang pangobiyerno, sa paggamit sa pwersa militar ug pulis biyolensiya batok sa kabililhon ug dignidad sa tawo. Nisamot ang pagkabahinbahin sa mga lungsuranon. Ang kahiusahan taphaw ra kaayo. Peligro nga dili kini makapalig-on sa mga tawo nga mahimong maayo ug makatarunganon nga lungsuranon.

Ato itanyag kon unsa ang ang makapahiusa ug makapatunhay gayud sa kalinaw tali sa mga tawo. Balik kita sa pag-ila ug pagsunod sa pagbuot sa Dios. Kay siya man ang magbubuhat natong tanan – mga maayo man o dili. Inosente man o sad-an. Siya gayod ang nasayod kung unsa paagi sa paghibalik sa kamatuoran, katarong, gugma ug kalinaw alang sa tanan.

Unsa man ang pagbuot diay sa Dios niining atong kahimtang karon? Ang matag usa kanato adunay iyang kaugalingong dalan nga angay subayon sumala sa iyang kahimtang sa kinabuhi. Sa ato pa, lainlain ang gitahas sa Dios alang sa matag usa apan magkahiusa lang gihapon tungod ang tanan nakagamot man sa Dios. Kon dili, magresulta sa pagsamot sa problema sa tawo.

Dunay mga kasuguan ang Dios sama sa 10 ka sugo Niya. Ang Estado usab adunay mga kasuguan alang sa kagamhanan ug mga lungsuranon. Ang matag usa ka tawo adunay iyang kaugalingong bahin niini sa pagtuman. Kon magmatinud-anon lamang ang matag usa sa pagtuman sa pagbuot sa Dios ug sa estado alang sa kaayuhan ug kalamboan sa tanan, makab-ot ang tiunay ug molahutay nga kalingkawasan sa tanang problema sa katilingban. Balikon nato ang Pulong sa Dios. Sumala sa Mat. 7:21-23, Ang Ginoong Jesus nagakanayon, “Dili ang tanang magaingon kanako, ‘Ginoo, Ginoo,’ makasulod sa gingharian sa langit, kondili ang nagatuman sa kabubut-on sa akong Amahan nga anaa sa langit. Daghan unya ang magaingon kanako niadtong adlawa, ‘Ginoo, Ginoo, dili ba nanaghimo man kamig mga propesiya tungod sa imong ngalan, ug nanagpagula sa mga yawa tungod sa imong ngalan, ug nakahimo sa daghang mga milagro tungod sa imong ngalan?’ Ug unya magaingon ako kanila, ‘Wala ko gayud kamo igkaila; pahawa kanako, kamong mga mamumuhat ug dautan.'”