San Pedro Calungsod Quasi Parish Fund Raising Activities

Nagapadayon ang “Fund Raising Activities” sa San Pedro Calungsod Quasi Parish aron sa pagpatukod ug simbahan. Adunay “Alay Piso”, 500 Club ug Signature Campaign. Ang Signature Campaign ang ulahing gilunsad niadtong Enero 2017. Kada ministriya, mga Gagmay’ng Kristohanong Katilingban, mga grupo ug mga indibidwal gihatagan ug libro aron papirmahan sa mga kaila, kapamilya, katrabaho ug sakop sa matag GKKs. Ang kada pirma nagkantidad ug singko pesos. Aduna pud libro ginabutang gawas sa simbahan aron ang ubang miyembro ug manimbahay mopirma kung wala pa nagsugod ang misa o human sa misa. Ang kada cover sa libro adunay gibutang nga “perspective view” sa pagatukorong simbahan nga gidisenyo ni John Paul Aloy, usa ka miyembro sa SPCQP. Ang inspirasyon sa disenyo mao ang Patron nga si San Pedro Calungsod nga usa ka Pilipinong Santo, ug ang lugar nga Baguio nga diin adunay mga lumolupyo nga mga nagkalain-laing tribu, ug mga produktong “Durian” gikan sa mga katilingban nga nasakop sa Parokya.

Isip pagsaulog sab sa ikaduhang piyesta sa San Pedro Calungsod, adunay pagahimuon nga, “Fun Run para kay Kuya San Pedro,” karong umaabot nga Oktubre 14, 2017, alas-4 sa kadlawon. Giawhag sab ang tanang miyembro, mga lideres ug mga interesado nga magparehistro. Mag-fill up lang ug registration form ug mohatag ug P300. Ang tanang magparehistro makadawat ug singlet. Alang sa mga miyembro sa matag GKKs nga buot magparehistro duol lang mo sa inyong mga lideres alang sa registration. Sa tanang interesado nga gawas sa Parokya adto lang sa opisina alang sa “registration form” o mamahimong motext o motawag sa numero sa opisina 09256380326. Mamahimo sab mobisita sa San Pedro Calungsod Quasi Parish – Baguio District Facebook Page. (Lorelyn May A. Lahoy Lahoy | SoCCom SPCQP)