Tigbabasa sa Bunawan, gipahinumduman

Kalipay sa matag miyembro sa Lectors, Commentators, Cantors and Psalmists sa parokya sa Sr. Santiago Apostol nga makakat-on pa ug daghan. Busa nagtuon usab sila sa Church Decorum, di pa lamang madugay. (SJAP Bunawan SoCCom)

Uban sa tinguha nga mapalambo ang ministriya sa Lectors, Commentators, Cantors og Psalmists kon LCCP, nagtapok ang maong pundok niadtong Hulyo 30 sa Seminar House sa Sr. Santiago Apostol, Bunawan, Davao City.

Si Sr. Angela Dejucos, OSB gikan sa Archdiocesan Liturgical Center kon ALC nagtudlo sa mga sulundon sa Katolikong Simbahan o Church Decorum.

Human ang pag-ampo, misunod ang mensahe gikan sa coordinator sa LCCP nga si Anabelle Logatiman. Dayon misunod ang pagtulon-an diin gibalikan ni Sister Angela ang unang panagtapok pila na ka bulan ang nilabay nga naghisgot mahitungod sa katungdanan isip usa ka lector. Matud niya ang pagka lector mamahimong pamaagi aron mapanindot pa ang relasyon tali sa Ginoo ug sa katawhan diin mabalik ang gasa nga gihatag Niya kanato. Saysay niya nga sundon ang mga musunod: 1. Ang pag adto sa Simbahan 5 hangtud 10 minutos una magsugod ang Misa aron sa pagpangandam ug pagpamalandong; 2. Ang pagsuot ug disente og angay gayud sa Simbahan nga suoton; ug 3. Ang kalinaw sa pagsaulog sa Santos nga Misa.

Pipila lamang kini sa daghan pa nga iyang gisaysay nga nalimtan na sa kasagarang katoliko kay ang uban nagsabay sabay na lamang sa tudlo ug ginabuhat sa uban.

Sa katapusan, nagpasalamat ang mga miyembro sa LCCP sa gigahin nga oras ug panahon ni Sister Angela aron sa pagtudlo sa mga parokyanong aktibo sa LCCP sa Bunawan.

Kabahin ang maong lecture sa pipila ka pormasyon nga ginahatag sa mga lector ug commentator sa parokya. Kini aron magiyahan sila sa ilang buhaton isip mga sumbanan sa mga mass goer nga mulantaw kanila. (Ervie Ghen Pelderos | SJAP SoCCom)