Abunda dili lang sa prutas

The Most Sacred Heart of Jesus Parish, Calinan

“Aron makat-on sa Pulong sa Diyos ug matubag ang iyang tawag.”

Kini matud pa ni Khenny Jay Herman, taga GKK Birhen sa Lourdes. Siya usa sa onse nga seminarista nga mitambong sa Pontifical Mass atol ika-67 nga kapistahan sa The Most Sacred Heart of Jesus Parish, Calinan niadtong Agosto 4 subay sa tema: “Balaan nga Kasing-kasing ni Hesus, Tinubdan sa Mahigugmaong Kahiusahan ug Mapasalamatong Katilingban.”

Ang onse nga seminarista gipasidunggan ni Davao Archbishop Romulo G. Valles, D.D. sa alas 8 nga misa. Matud niya nga dili lang prutas ang naa sa Calinan, abunda sab kini sa mga seminarista.

Nagpahinumdom sab siya nga ang panagtapok ug pagmaya sa katawhan nagpahinumdum nga anaa ang Ginoo sa kanunay.

“Ang iyang pinakapalanggang kasingkasing muatiman gyud kanato…today is the assuring nga dili kita pasagdan sa Ginoo,” matud pa sa Arsobispo. Dugang niya, “kanang gimbug-aton nga atong gisagubang magaan kana. Di na kaayo ta mahadlok tungod kay ang iyang kasingkasing malumo, masinabtanon, maluluy-on ug mahigugmaon.”

Matud sa Asst. Parish Priest Fr. Raul Nieves natukod ang simbahan gumikan sa Canadian missionaries kon PME fathers nga nagmisyon didto unom ka dekada na ang milabay.

Sumala pa niya nga ang orihinal nga kapistahan sa parokya ginasaulog kada Marso, apan nasabutan sa mga pari nga ibalhin kini sa bulan sa Agosto subay sa abundang ani sa mga prutas. (Dan Lester Albarracin | HCDC intern)