St. Mary’s Parish, Buhangin: Food Bank for the Poor Program

Mapadayonon ang Food Bank for the Poor program sa Parokya sa St. Mary of the Perpetual Rosary nga gisuportahan sa Kura Paroko nga si Fr. Jess Samaniego ubos sa pagdumala sa Parish Social Action Ministry nga gipangulohan sa PSAM Coordinator Joel Corage ug sa Program in-charge nga si Alede Premacio.

Mao kini nga programa nga nagserbisyo sa mga kabos nga mga benipisyaryo sa nagkalain-laing GKK nga sakop sa parokya. Kasamtangan adunay 142 ka mga benepisyaryo.

Proseso sa pagdawat isip benepisyaryo sa maong programa mao nga sila rekomendado sa PSK ug sa PSA nga in-charge sa Socio-Economic and Social Services sa ilang GKK. Sila angayang tabangan tungod sa kaubos sa ilang pinansyal nga kita ug ang uban nga nagahulat lang sa hinabang sa mga ubang miyembro sa pamilya.

Ang mga benepisyaryo makapalit og bugas, canned goods, noodles sa ubos kaayo nga presyo nga makaya sa ilang inadlaw-adlaw nga kita sama sa bugas nga P10.00 lang ang kada kilo. Ang mga goods nagagikan sa mga halad panahon sa Misa ug sa ubang manggihatagon nga mga Parokyano.

Kada unang Domingo sa bulan adunay pormasyon nga gihatag ang mga PSAM formators sa mga benepisyaryo aron ma mentenar nila ang ilang dignidad isip tao ug miembro sa katilingban ug ilabina usa ka parokyano. Gipa-ambit sa ila ang pulong sa Ginoo ug gina-awhag nga motambong sa mga kalihukan sa ilang GKK ug sa parokya. (Hermie Mapute, Parish SoCCom)