Amuma nag medical mission sa Mulig

Napahigayon nga malampuson ang medical mission sa Mulig Toril Covered Court isip pagsaulog sa ika katorse ka tuig sa Amuma Cancer Support Group Foundation, Inc.

Matod sa ikaduhang pangulo sa Foundation nga si Bella Sarenas nga sa tanan nilang mission nagasugod sila sa Santos na Misa.

Gisaulog kura paroko nga si Rev. Fr. Johnny Autida sa kapilya sa San Vicente, Mulig ang misa.

Sulti ni Fr. Johnny sa iyang homiliya nga gikan sa ebanghelyo ni San Mateo, ang mga pulong ni Hesus sa nagdayeg ug nagpasalamat sa Amahan. Siya mipadayag ngadto sa mga tawo nga yano ug mapaubsanon ug iya kining gililong sa mga maalamon.

Ikaduha, walay nakaila sa Anak gawas sa Amahan ug walay nakaila sa Amahan gawas sa Anak.Ug kadtong mga tawo nga buot sa Anak nga makaila sa Amahan.Mao nga kinahanglan duol kita ug nakaila sa Kristo kanato aron duol usab kita sa Amahan.

Ikatulo, mahitungod kanato nga iyang mga sumusunod. Niingon Siya ari kamo Kanako nga mga gikapoyan ug nabug-atan sa inyong gipas-an ug papahulayon Ko kamo. Isangon ang akong yugo ug sunda ako ug makapahulay kamo, kay malumo ako ug mapaubsanon.

Kini nagpasabot nga himuon natong partner ug ka timbang si Kristo aron mugaan ang atong pas-anon nga problema ug kasakit sa kinabuhi.

Usa ka blessing kuno ang pagpili sa Amuma sa maong lugar alang sa medical mission.

Human sa Misa gisugdan ang medical mission sa pag-ampo ug welcome address nga gihatag ni Kapitan Carmelo Clarion. Kini giapilan sa 23 ka doctors, 40 Amumans, nurses ug uban pang nagboluntaryo sa ilang sebisyo. Kapin 500 ang mga pasyente nga naka avail sa libreng medical ug opthal checkup ug minor surgery. Aduna usab silay gipanghatag nga eye glasses, toothpaste, toothbrush ug mga tambal.

Ang Amuma gisugdan niadtong Hulyo 5, 2003 sa unang presidente ug founder nga si Dra. Margarette P. Domingo. Sa kasamtangan, ang Foundation gipangulohan ni Mae Hipolito. (Lilibeth Sancover |VDLR SoCCom)