Social Media literacy gitudlo sa school catechists

Gipadala ang 19 ka katekista sa San Antonio de Padua, Agdao, sa misyon sa pagpanudlo sa mga bata diha sa pampublikong tulunghaan nga nasakop sa maong parokya. Kini gihimo diha sulod sa Santos nga Misa niadtong Dominggo 8 sa buntag ni Fr. Anthony Silvosa, parish vicar.

Hagit ni Fr. Silvosa kanila ug sa tanang sumusunod ni Kristo nga naminaw kaniya niadtong tungora, ang pagkinabuhi sa “gugma nga tali sa Krus ni Kristo, sa pagka-maabiabihon ug pagka-manggihatagon sa uban dili tungod kay kinahanglan nila ang pagka-maabiabihon ug pagka-manggihatagon sa usa ka sumusunod kundili tungod iya kining gibuhat alang sa gugma sa krus ni Kristo.”

Dayon, nakighiusa ang tanan sa mga kaubanan sa bikaryato sa Sta. Ana aron maupdate una sila bag-o magsugod sa mga tulunghaan. Nagpahinumdom si Sr. Lydia Perales, staff sa John XXIII Catechetical Center kabahin sa mga ang-ang sa pagtubo sa mga kabataan ug pagka-andam nila alang sa mensahe.

“Ang katekista mao ang modelo sa kabataan,” sumala ni Sr. Lydia. “Your post must lead people to pray. Go F.I.S.H. – magtukod og Christ-centered friendship online, magpakaylap og images nga nagapakita sa truth, beauty, and goodness.”

Ang tuig sa pagpanudlo mao ang tuig nga “malipayon, tuig nga mabungahon, tuig nga maampoon,” ang panapos nga pulong ni Msgr. Max Sarno, Director sa John XXIII Catechetical Center, isip pagsara sa iyang pakig-istorya ug pagpaklaro sa mga pangutana sa mga katekista sa Sta. Ana Vicariate. (Elena Mozo | SAP SoCCom)