Pagsuta sa epekto sa kalihukan gipahitabo

Malampuson nga gipahigayon sa St. Francis of Assisi Parish – La Verna ang Mid-year Evaluation and Planning niadtong Hulyo 7 ug 8 sa San Jose, Peñaplata uban sa kura paroko nga si Fr. Junar Dela Victoria.

Ang maong panagtigom gitambongan sa mga Pangulo sa Katilingban (PSK) nga sakop sa parokya, mga coordinator sa mga nagkalain-laing ministriya sama sa PSL, EMHC or Lay Minister, Pangulo sa Kristohanong Banay (PSKB) ug Family and Life Apostolate (FLA), Divine Mercy Parish Coordinator, Formators, Liturgy coordinator. Miabot sa 25 ka partisipante ang nitambong sa maong kalihukan.

Naghatag ug insights si Sisoy Kintanar nga sakop sa GKK San Jose JLA Subd. Ang topic nga iyang gihatag mao ang “Change” o pagdawat sa mga kabag-ohan dili lamang sa parokya kon dli usab sa atong sosyodad.

Matud pa ni Sisoy kinahanglan isip mga lideres andam ta nga mo “go out of the box” o mogawas ta sa atong comfort zones. Dili ta magpabilin sa atong naandan kondili andam ta mo-adapt sa mga kabag-ohan alang sa kalamboan sa atong organisasyon o sa atong tagsa-tagsa ka mga GKK ug sa atong parokya. Ang unang session gitapos sa pagrosaryo.

Gifacilitate ni Fr. Junar ang evaluation. Gibahin sa duha ka grupo ang mga partisipante ug dunay gihatag nga 2 ka mga pangutana aron tubagon sa grupo nga mao ang “success ug hagit.”

Success nga mga kalihukan/panghitabo sulod sa usa ka tuig gikan June 2016 hangtud Mayo 2017 ug unsa pay mga hagit nga maoy angayan nga tutukan sa umaabot pang katuigan.

After sa small group discussion, gireport kini diha sa grupo ug nakita nga aduna nay paglambo sa ispiritual nga aspeto sa kinatibuk-an tungod sa nagpadayon nga mga parish satellite masses, GKK visitations sa kura paroko ug uban pang kalihukan nga makadani sa mga membro.

Gitapos ang maong panagtigom sa usa ka misa. (Sylvia Orbeta | SFA LaVerna)