Marawi

Samtang nagpadayon pa ang gubat sa Marawi, ang mga kaobispohan sa Pilipinas miingon, “nagtiyabaw ang atong mga kasingkasing sa pag-ingon: ‘Dili na unta mahitabo pag-usab ang gubat sa Marawi. Wagtangon na dayon ang gubat sa Marawi. Busa kami nagaawhag sa pagpabalik sa labing madaling panahon sa kalinaw ug kahusay didto sa Marawi ug sa mga kasilinganan. Nagduhaduha kami kon ang padayon nga pagpatuman sa Martial Law, ug ang pagdugay pa niini mao gayud ang makapabalik sa kalinaw ug kahusay sa Marawi.'”

Daghan nang mga kinabuhi ang naguba ug nasamdan; mga katigayunan nadaot ug nawagtang; mga kasaysayan ug handuman sa pamilya ug kultura nasunog sa pagpamomba ug pagsunog. Labaw sa tanan, daghan nang kinabuhi sa tawo ang nasakripisyo.

Sayon, dali, ug basin pa gani lami ang pagguba ug pagdaot, pagpatay. Gasto pud sa panahon ug salapi. Pastilan! Lisod kaayo, dugay, ug hago ang pagayo, pagpahiuli ug pagbuhi sa tanan. Ug naa pud mga butang na dili na gayud mabalik. Pastilan!

Sa nagsingapos ang miaging administrasyon, ang nasod nasamdan sa Mamasapano massacre. Karon sa unang tuig pa lang sa bag-ong administrasyon, giyera na dayon. Batok sa ilegal nga droga, kriminalidad, ug corruption. Patay diri ug didto. Asa kaha kita padulong? Unsa ug asa na kahay sunod nga giyera?

Santa Maria, Birhen sa Fatima, Inahan sa kalooy ug Rayna sa kalinaw, ig-ampo mo kaming makasasala.

Jesus, nagasalig kami kanimo. Luwasa kami.