Fun Run sa Talicud nakatabang sa parokya

Malampusong gipahigayon ang 1st Fun Run sa Talicud Island niadtong Hunyo 17, 2017. Kapin usa ka gatus ang mga partisipante gikan sa 4 ka mga barangay sa isla: Brgy. Sta. Cruz, Brgy. Dadatan, Brgy. Linosotan ug Brgy. Cogon.

Gisugdan kini alas 4 sa buntag sa zumba dance aron maandam ang mga partisipante sa pagpanagan. Dayon giapud apuran ang mga partisipante ug saging ug bottled water aron ibaon sa ilang pagpanagan.

Kining fun run activity giduso ni Brgy. Kagawad Miguel Dombase atul sa calebration sa Araw ng Brgy. Sta Cruz karong umaabot nga Hunyo 21, 2017 subay sa tema: “Dagan alang sa Espirituhanong kalambuan.” Tumong niining aktibidad nga ma-promote ang Talicud Island isip usa ka tourist destination, maayong panglawas sa managan, panaghigalaay, ug masuportahan ang Sta.Cruz Parish.

Matud pa ni Roseliza Cahapay, usa sa mga partisipante, daku kaayo iyang kalipay nga nakasalmut siya. Bisan paman ug wala niya nadagan ang tibuok isla kay misakay siya sa rescuers mobile, fulfilling gihapon sa iyang kabahin nga nakatabang siya og nalingaw.

Gipaabot sa mga partisipante sa kura paruko sa Sta. Cruz Parish nga si Fr. Rico Enriquez nga himuon kining fun run kada tuig tungod kay giganahan sila apan itunong kini sa summer vacation aron makaapil ilabi na ang mga batan-on nga nag eskwela sa Dabaw. Hangyo sab nila nga isemento ang kadalanan sa Talicud Island tungod kay sakit kaayo sa tiil bisan pa og naka rubber shoes sila. Sa Brgy. Sta Cruz Hall naghulat ang unlimited food sama sa lugaw, saging, ug bottled water. Didto usa ang finish line. Nahuman ang aktibidad alas 7 sa buntag. (Jurick Bongato | SCP SoCCom)