54th Kapistahan sa San Antonio de Padua Parish, Agdao

PILGRIMAGE MASSES

Una miabot ang 54 nga kapistahan, gilibot sa parokya si San Antonio de Padua diha sa mga Santos nga Misa o Novena Masses nga gipahinungod kaniya niadtong Enero hangtod Mayo niining tuiga.

Uban sa pagtoo nga si San Antonio gayud ang mibisita kanila, mahinangpon nga gidawat sa siyam ka sona ang matag gabii nga kasaulogan sa Santos nga Misa, nga pulihanay nga gipangulohan sa ilang mga pari, Padre Toto España ug Padre Don Silvosa.

Mipauli ang imahe ni San Antonio de Padua sa Simbahan niadtong katapusang semana sa Mayo, una masugdan ang Novena Masses alang sa iyang kapistahan. Gihatod siya diha sa usa ka prosesyon gikan sa zone 9, sa Barangay Leon Garcia.

MGA PARI NGA TUBONG AGDAO

Namunga ang masangyawon nga kinabuhi sa parokya sa San Antonio de Padua diha sa walo (8) ka pari nga nahimugso ug midako sa mga GKK sa parokya, sila: Fr. Mervin Maglana, DCD, Fr. Randy Baluso, DCD, Fr. Dionisio Tabiliran, DCD, Fr. Larry Sabud, SM, Fr. Napoleon Sepalay, Jr., OP, Fr. Proceso Gimeno, Jr., DCD, Fr. Ricky Peñalosa, DCD, ug Fr. Angelito Ancla, CMF.

Sila Fr. Gimeno, Fr. Peñalosa, Fr. Tabiliran ug Fr. Maglana nakabalik sa ilang “home parish” aron mopalanog sa maayong balita sa pagpakabana, pakiglambigit sa misyon sa Simbahan, pag-alagad, pagpasalamat ug kalinaw diha sa ilang mga Homiliya sa Novena Masses.

PARISH DAY

Yano ug malinawon nga selebrasyon apan puno sa kasadya ang nasinati sa mga parokyano sa San Antonio de Padua, Agdao, niadtong Parish Day, Hunyo 11.

Santos nga Misa, sa alas otso sa buntag, ang miabli sa maong selebrasyon kung diin nagtapok ang mga GSL aron sa pagpanaad sa ilang commitment sa pag-alagad ug sa pagpadala sa siyam ka bag-ong mga Pangulo sa Liturhiya (PSL).

Mga Pilipinhon nga mga balay-balay, nga nagbaligya sa nagkalain-laing produkto sa siyam ka sona ang mibarog diha sa ilang tugkaran hangtod sa adlaw sa kapistahan. Ang programa sa gabii sa St. Mary’s Hall mipakita sa ilang talento sa pag-mugna ug pagsayaw sa folk dances ug kahiusahan sa matag sona. Kini ang mihuman sa selebrasyon sa Adlaw sa Parokya. Contest kato maong ang migawas nga mga mananaog mao ang sona 6, champion, sona 9, 1st place, ug sona 5, 2nd place. Gipili usab ang pundok nga misuot sa Best in Costume, ang sona 1.

HALAD PASALAMAT

Nag-ALAY LINIS ang siyam ka sona nianang Hunyo 12, sa alas 3:00 sa hapon aron pag-andam sa Simbahan ug sa palibot niini.

Abtik, mapasalamaton ug maalagaron ang mga miabot nga mga GSL, batan-on ug mga bata. Kini nga kinaiya sa pagka-maalagaron ang naghatag og kinabuhi sa mga pulong ni Fr. Ricky Peñalosa, sa iyang pag-ingon diha sa homiliya sa ika-tulong adlaw sa Novena Mass, nga “ang pag-alagad, pagpasalamat.” Halad pasalamat sa ika-54 ka tuig sa ilang parokya!

PRUSISYON NI SAN ANTONIO DE PADUA UG SA IYANG PAROKYA

Misugod sa pagbaktas gawas sa Simbahan sa alas 4:30 sa kaadlawon si Padre Toto España kauban ang iyang mga parokyano aron sa pagsuroy sa imahe ni San Antonio de Padua atol sa adlaw sa iyang kapistahan, Hunyo trese.

Gihatagan usab og dakong kabahin si Santa Maria, Inahan sa Dios, diha sa procession ingon nga pag-hinumdon sa iyang ikaduha nga pagpakita sa tulo ka bata o ang 100th ka tuig sa iyang apparition didto sa Fatima, Portugal. Ang pag-ampo sa Santos nga Rosaryo ug ang pagkanta sa GOZOS ang milanog sa kadalanan sa sayo sa kabuntagon nga nahuman diha sa Simbahan aron saulogon ang alas sais nga Santos nga Misa.

PONTIFICAL MASS

Inubanan sa napulo ug lima ka pari, gisaulog sa Arsobispo sa Davao, Romulo G. Valles, ang Santos nga Misa alang sa kapistahan ni San Antonio de Padua diha sa Simbahan sa Parokya, sa Agdao, alas 5:00 sa hapon niadtong Hunyo trese.

Nalipay ang mga parokyano sa nakita nga kadaghanon sa mga pari nga miapil sa Santos nga Misa. “Inspiring, maka-pahinumdom kanako nga mag-binuotan,” ingon sa usa ka parokyano sa iyang paglantaw kanila nga naglakaw padulong sa Altar.

Mao usab kini ang unang mensahe ni Archbishop Valles, nga “tinud-on ang gasa sa pagka-buotan, sa pagka-balaan.” Siya midugang sa pag-ingon, isip ika-duha nga mensahe, nga “kasaligan gayud ang atong Dios; ayaw kabalaka kay He is constant.” Ug sa katapusan siya niingon, “taga-Agdao, kamo ang asin ug kahayag sa kalibutan – service, influence, pag-alagad sa katilingban nga mura og asin ug kahayag sa katilingban.”

DENTAL MISSION

Kabahin sa kapistahan sa parokya ni San Antonio de Padua, Agdao, ang Dental Mission nga napahigayon niadtong buntag sa Hunyo 12.

Adunay kawaloan (80) ka mga pasyente ang naibtan og ngipon pinaagi sa paningkamot sa usa ka parokyano, Dra. Arlien Bacanaya. Iyang naimbita ang lima pa ka mga dentists: Dr. Arnel Mission, Dr. Sarah Jane Importante, Dr. Andre Guada Jumangin, Dr. Joan Balansag, ug Dr. Janet Gullod. Matud pa ni Dr. Bacanaya nga malipayon sila tungod kay “sa pamaagi sa among nahibaloan, nakatabang kami sa mga nanginahanglang parokyano sa Agdao.”

Mapasalamaton usab si Fr. Toto España, kura paroko, kang Mr. and Mrs. Robert and Miraflor Maquiling sa ilang donasyon nga mga tambal ug uban pang galamiton alang sa dental mission. Dugang pasalamat ang buot ipaabot ni Fr. Toto alang sa mga doctors and staff, school catechists, parochial staff, zone coordinators, mga GSLs.

Dalaygon ang Langitnong Amahan, tuburan sa pagka-manggihatagon ug pagka-maloloy-on! (Elena Corazon Mozo | Gary Guivencan | SAP SoCCom)