ICP Peñaplata nagsaulog sa Tuig sa Parokya

Nahimong espesyal ang pagsaulog sa Tuig sa Parokya didto sa Immaculada Concepcion – Peñaplata niadtong Hunyo 12, kasumaran sa pagkapari ni Fr. Danillo B. Dotollo, DCD, ang kura paroko.

“Everything happens for a reason. Dili coincidence nga atol sa atong pagsaulog ning Tuig sa Parokya, mao usab ang kasumaran sa pagkapari ni Fr. Danny. Siya gasa sa Dios kanato; tungod kay pinaagi sa iyang amahanong pag-amuma, iyahang gi-restore ang atong nagkaluya nga commitment sa pagpangalagad,” matud pa ni Clemente Delfin, PSK Coordinator sa parokya.

Giniyahan sa tema, “Panaghiusa Uban sa Gugma diha sa Pagpangalagad Dungan sa Atong Pagsaulog niining Tuig sa Parokya,” ang maong aktibidad nga gitambongan sa mga GKK leaders ug ubang parokyano, gisugdan pinaagi sa Santos nga Eyukaristiya. Kini gisundan sa pagpalawom mahitungod sa tema sa Tuig sa Parokya nga gipaambit ni Mr. Dennis O. Asumbrado, Marketing Coordinator sa DC Herald ug DXGN Spirit FM. Hagit niya: Sulod sa kadugayon sa atong pagpangalagad, unsa’y kausaban sa atong kinabuhi? Ang matag usa kanato kinahanglang magpakita ug konkretong buhat sa gugma ug kaluoy aron makita sa katawhan dinhi kanato si Kristo.”

Pagkaudto, nagkahiusa ang tanan sa pagpangaon. Ug pagkahapon gipahigayon ang programa apil na ang “parlor games” ug pagpakita sa mga talento sa ubang GKK leaders. (Lemuel Asdang | ICP SoCCom)