Ang atong misyon

Ika-13 nga Domingo sa Ordinaryong Panahon
2 Kgs 4:8-11, 14-16a/ Ps 89/ Rom 6:3-4, 8-11/ Mt 10:34-42

Ang kasagaran nga mo santop sa atong hunahuna kung maghisgot kita og misyon mao ang pagsangyaw sa Maayong Balita ngadto sa atong isigkatawo, insakto kana, apan dili kana ang tanan,kon dili, maka ingon kita nga kabahin kana.

Ang laing bahin, gani ang labing importanting bahin sa atong misyon mao ang PAGHIGUGMA SA DIOS LABAW SA TANAN. Mao kini ang hagit ni Kristo sa atong Ebanghelyo karun Dominggoha, ika-napulog tulo nga Dominggo sa Tuig.

Ang atong Ginoong Jesukristo napahinumdom kanato niining maong bahin sa atong misyon. Siya miingon: “Ang mahigugma sa iyang amahan o inahan labaw kanako dili angay kanako, ug kinsa kadtong mahigugma sa iyang anak lalaki o anak babaye labaw kanako, dili angay kanako.” Tataw kaayo mga igsoon niining mga pulong sa atong Ginoong Jesukristo nga ang Ginoo ang una, ang Ginoo ang LABAW SA TANAN.

Mao nga maayo siguro atong usisahon ang atong tagsa-tagsa ka kaugalingon kung nakatuman ba kita niining bahina sa atong misyon, ang labing importanting bahin sa atong misyon. ATO BANG GIHIGUGMA ANG GINOO LABAW SA TANAN? ATO BANG GIHIGUGMA SI KRISTO LABAW SA TANAN?

Ang mga timaan sa atong paghigugma kang Kristo labaw sa tanan una; mao ang pagpas-an sa atong KRUS ug ang ikaduha mao ang makanunayong pasunod kaniya matag adlaw. Kining duha klaro nga gipadayag ni Kristo diha sa atong Ebanghelyo; “Ang dili mopas-an sa iyang krus ug mosunod kanako dili angay kanako.” Importante gayod di ay ang krus diha sa atong kinabuhi, tungod kay mao usab kini ang indikasyon sa atong pagsunod kang Kristo. Unsay man di ay anaa niini krus? Ug nganung sa Kristo nagdasig man gayod kanato sa pagpas-an o pagdawat niini? Ang rason mao nga ang KRUS gahum sa Dios; si san Pablo nagmatood niini sa iyang pag-ingon; “Ang Krus us aka dakung binuang alang niadtong wala maluwas apan alang kanatong naluwas gahum kini sa Dios.” Kon kini gahum sa Dios ang lintunganay niini mao ang atong kaluwasan. Panahon sa kwaresma kita nagahimo sa dalan sa KRUS. Matag estasyon mtubag kita; “tungod sa Imong BALAANG KRUS GITUBOS O GILUWAS MO ANG kalibutan.” Ang estasyon sa Krus adunay katorse (14) ka estasyon, ang kataposang estasyon mao ang pagkabanhaw. Mao nga kon kita nahigugma sa Dios labaw sa tanan kita naglakaw padulong sa kaluwasan. Hinaot pa unta.