Keep the Faith

Matud pa ni Arsobispo Romulo G. Valles, D.D. sa iyang wali sa Santos nga Misa atol sa kapistahan sa patron nga si San Pedro nga dili mubiya ang Ginoo sa atoang kinabuhi, “God will never never abandon us, in the midst, in the thick of suffering and fear and darkness, the Lord will come.”

Niay sugilanon ni Marites Novo kansang kinabuhi, simple, apan kakuhaan ug maayong lesson. Salamat sa nagsuwat niini nga si Rhea Joy Mingming, AB Mass Comm intern gikan sa HCDC. Happy reading!

* * * * * *

Si Marites (extreme left) kauban ang GKK Formators sa San Pedro Cathedral. (Marites Novo FB)

Kini mao ang gibutyag ni Marites Novo, usa ka aktibong parokyano sa kalihukan sa San Pedro Cathedral sukad 1981, apan niundang og duha ka tuig tungod sa dakong pagsulay nga nahitabo sa iyang pamilya.

Sa panahong nagtrabaho siya Simbahan, ang iyang nag-inusarang anak nagkasakit nga miresulta sa iyang pag-undang. Gisabayan pa sa paghawa sa iyang bana sa simbahan tungod sa gagmay’ng mga isyu kaniadto.

Sa pag-undang niya, siya nakabati ug kakulangan sa iyang kinabuhi, “mura man jud nay kulang, mao naman gud to akong naandan pag-gradweyt nako ug high school, nagdiritso ko ug pagtudlo isip katekista, lahi ra gyud siya,” sumala pa niya.

Sa panahon sa iyang pag-undang siya gipadamgo sa Birheng Maria. Sumala niya, “nakadamgo ko ug silaw kaayo, tapos didto nakita nako si Mama Mary.”

Kini nga engkwentro ang gi-isip niya nga pamatuod nga pabalikon gayud siya sa pagpanerbisyo sa simbahan. Nibalik siya sa pagpangalagad human matagamtaman ang presensya sa Diyos isip usa ka Pangulo sa Katilingban.

Kining kapistahan ni San Pedro usa napud ka gutlo sa iyang kinabuhi gikan 1981 hantod karun nga siya nagpabiling aktibo sa pagpakiglambigit sa Simbahan. Bisan pa sa dakong sugilanon nga giatubang ni Marites wala siya biya-i sa Ginoo. Anaa lang gihapon kaniya ang grasya sa pagtoo nga gihatag sa Diyos. “Naa lang gihapon siya, siya lang jud akong kanunay nga ginasampit, musampit lang ko’g Lord kabalo ko nga dili nimo ni ihatag sa akoa kung dili ni nako kaya, pero tabangi lang jud ko.”

Dugang pa niya, “kung tinuod jud atong pagtuo ang pagpangalagad kinasingkasing wala ra gyud nang mga problema, mulabay ra na siya. Kay ang pagpangalagad dili ang tawo ang nagtawag kundili ang Ginoo.”

Sa kasamtangan siya sekretarya sa GKK Formation sa San Pedro Cathedral. Malipayon ug kontento na ang kinabuhi ni Marites nga padayong nagserbisyo sa GKK kauban ang iyang anak babaye ug padayong nagatugtug ang iyang bana sa mga kapilya ug nagkalain-laing kalihukan sa simbahan, “kuntento na kay ko sa akong life, kauban naku akong anak diria sa GKK tas akong bana pud kay kasabot pud siya sa akoa nganong wala ko pirmi sa balay. Pasalamat ko sa Ginoo kay naka bana ko’g sama kaniya nga kasabot pud sa mga kalihukan sa simbahan.”

* * * * * *

Daghang salamat Marites sa imong kasinatian. Sumala pa sa Arsobispo, “keep the faith”, padayon lamang sa pagtoo ug pagsalig sa Ginoo kay kita panalanginan gayud. ‘Til next kwentuhan, higala!