Pista sa GKK MOPH Toril

Ang GKK Mother of Perpetual Help nagsaulog sa ika-14 nga kapistahan di pa lamang dugay. Ang maong GKK nga makita dinhi sa Blk. 7, Bohol Avenue nga nahisakop sa Santo Rosario Parish, Toril nagsubay sa tema, “Birhen Maria, Inahan nga Maloloy-on ug Mahigugmaon.”

Nagsugod ang kasaulogan alas 10 sa buntag ni Rev Fr. Roy Mejias, kura paroko. Gitambungan kini sa mga opisayales ug miyembro sa maong GKK. Nakigduyog sab ang Brgy. Kapitana dinhi sa Toril nga si Madam Lilibeth Al-ag ug iyang mga kagawad, staff ug functionaries.

Sa pagpaambit sa kura paroko, iyang gipalawom ang kahulogan sa balaod ni Moises ug sa pagtulon-an sa mga propeta. Matod pa, buhata sa uban ang buot ninyo nga buhaton nila kaninyo. Nagaingon nga diha sa maayong buhat ug maayong sulti molambo ang katawhan ug aron motubo nga positibo ang panlantaw. Pahimangno niya sa mga ginikanan nga magbuhat sa maayo sa isigkatawo, sa lumilihok sa GKK makigsandurot sa mga miembro aron mamahimong aktibo ug maghari ang kalinaw. Gibunyagan sulod sa misa ang 8 ka bata.

Human ang misa, nagpasalamat si Sis Leonila Zamora, ang PSK sa maong GKK sa tanang mitambong sa novena, misa ug tanang aktibidad sa pista. (Vita Benabese | SRP SoCCom)