1st SKP 2 symposium gipahigayon sa Agdao

Ang Sagop Kinabuhi Program 2 (SKP 2) nagapadayon ug tabang sa mga Voluntary Submission for Reformation (VSRs) persons. Sila ang mga drug surrendeeres nga gusto nang magbag-o sa ilang kinabuhi. Busa ang simbahan, wala nagpauwahi ug naningkamot nga tabangan sila.

Kahinumduman nga ang unang SKP 2 gimugna sa San Antonio Parish, Agdao. Dinhi nga parokya, niadtong Hunyo 25 gipahigayon ang kinaunhang symposium alang sa mga GKK Servant Leaders sa parokya.

Gipasabot nila ni Bro. Dennis Mabayao, Sis. Vicky Estoque-Anghag, Sr. Maris Arado, TDM, ug Bro. Jun Estoque ang kamahinungdanon ug kabililhon niining programa sa mga nalulong sa ginadili nga druga.

Matud ni Bro. Mabayao ang droga dili diha diha dayon mabiyaan, tungod kay usa kini ka sakit sa utok kon “brain illness.” Gipaklaro usab niya nga ang addiction, sakit sa hunahuna kon “mind illness”, managlahi kini.

Naminaw ug nakiglambigit ang mga GSLs ug pipila kanila ang nangutana mahitungod sa nagkagrabe ug nagkadaghan ang ihap nila sama na lamang sa Brgy. Lapu-lapu, Agdao nga adunay kapin usa ka gatos nga n VSRs.

Gihagit ni Sis. Vicky ang tanan pinaagi sa pagpakabana sa nagakahitabo sa atong katilingban karon. Giawhag niya nga ang mga VSR isip beneficiaries sa matag sona dili moabsent panahon sa mga sesyon nga pagabuhaton kalabot sa maong programa.

Sa katapusan, nagpadayag si Sr. Maris nga ang parokya sa San Antonio de Padua pa lang ang unang nakapahigayon og SKP2 symposium ug nagpasalamat siya ni Padre Toto España, Nena Cabig ang Parish Social Action Ministry kon PSAM Coordinator, Cecil, Tessie, Catalino ug sa uban pa nga mamahimo kining maong panagtigum nga mabungahon.

Ang SKP 2 mao ang programa nga gilunsad sa Arkidayosis sa Dabaw pinaagi sa iyang Archdiocesan Social Action Center (ASAC), dinuyogan sa University of Southeastern Philippines (USeP) aron makatampo sa muti-sectoral nga paningkamot nga makatabang nga makabalik ang mga nisurender, tungod sa gubat batok droga sa kagamhanan, ngadto sa sabakan sa ilang matag banay ug katilingban. (Gary Guivencan | SAP SoCCom)