Adlaw sa parokya sa Buhangin, nagpadayag sa kahiusa

Ang naandang kasaulogan sa Parish Day sa parokya sa St. Mary of the Perpetual Rosary ginapahigayon matag katapusang Domingo sa bulan sa Mayo. Busa, daghan ang nangutana ngano ang Parish Day gisaulog na man sa Hunyo 11.

Ang akong yano nga tubag kanila mao ang tema sa kasaulogan sa Parokya… “Kahiusahan sa mga Komunidad o Katilingban.” Tungod sa pulong kahiusahan angay nga hiniusa kining saulogon sa tibuok Pilipinas aron sa pagpadayag nga tinuod gayud nga anaa sa mga Pilipinong Katoliko ang kinasingkasing nga pagtamod sa pakiglambigitay alang sa kahiusa.

Pinaagi ning maong kahiusa mahataga’g katumanan ang tumong sa misyon sa Simbahan nga mao ang katilingbanon ug pangkinatibuk-ang kausaban (integral transformation) sa matag magtotoo ug sa paghimo sa gingharian sa Dios… ang gingharian sa hustisya, kalinaw, kahapsay ug kagawasan nga usa na ka reyalidad.

Ang 31st Parish Day Celebration sa St. Mary of the Perpetual Rosary sa Buhangin, gibahin sa upat: Santos nga Misa nga gipangulohan sa pagsaulog sa Kura Paroko nga si Fr. Jess Samaniego; pagpaambit ni Msgr. Max Sarno bahin sa Tuig sa Parokya; fellowship lunch; ug ang katapusan mao ang programa nga Sayaw dala Awit ug Drama nga giapilan sa 9 ka mga sona sa GKK, ministriya ug apostolado, ug nagkalainlaing grupo sa parokya. Nag enjoy sad ang tanan sa parlor games. (Naldz Villodres, SMPR SoCCom | Photos: Norie Santillan, Arsenia Barimbao, Edith Ibañez)