Inter Mirifica sa Tagakpan gipahigayon

Gipahigayon sa parokya sa San Francisco de Asis – Tagakpan ang seminar sa Inter Mirifica niadtong Hunyo 25, 2017 pinangunahan sa Social Communications Committee sa maong parokya. Gisalmutan kini sa mga secretary sa nagkadaiyang ministriya sa matag GKK nga nahisakop sa maong parokya.

Tumong sa maong seminar mao ang pagpaila-ila sa mga katungdanan sa usa ka miyembro sa SoCCom pagpaila-ila sa ilang papel sa Katolikong Simbahan.

Ang diskusyon gisugdan sa SoCCom member gikan sa GKK San Roque Crossing Tagakpan nga si Jeffren Miguel ug Charlou Daguplo, SocCom member gikan sa GKK Sto. Nimo North Naming.

Malipayon ang Kura Paroko sa maong parokya nga si Rev. Fr. Peter Fancubila, OSJ sa pagtambong sa mga SoCCom members sa nagkadaiyang mga GKK.

Matud pa niya, kini nagapakita ug maayong pagsugod labi na karon nga ginatagaan ug atensyon ang pagplastar sa SoCCom sa maong parokya.

Ang maong seminar gitambungan usab sa representante gikan sa Davao Verbum Dei Media Foundation, Inc. nga si Sis. Rica Dalaguit, DSP. Siya naghatag ug dugang input bahin sa importansya sa responsableng paggamit sa midya.

Buluhaton sa SoCCom member ang pagpatuman sa mga programa sa Archdiocesan Commission on Social Communications lakip na ang pagsulat ug mga balita gikan sa gilangkubang parokya o GKK alang sa katolikong mantalaan – ang Davao Catholic Herald o pagsibya niini sa atong istasyon – DXGN 89.9 Spirit FM.

Nagalaum ang mga SoCCom members sa maong parokya nga mamahimo silang matinud-anon sa gihuptan nga katungdanan aron mapakaylap ang Maayong Balita sa kaluwasan. (Rizzel Mae Daya | SFDA SoCCom)