Kids, Youth for Christ Camp sa Sta. Cruz Parish, Talicud

Gipahigayon ang Kids ug Youth for Christ camp niadtong Mayo 27-28 sa Sta. Cruz Parish, Talicud Island. Ang venue mao sa Sta. Cruz National High School.

Kini tubag sa Couples for Christ sa imbitasyon ni Fr. Rico Enriquez, ang kura paroko.

Malampuson gayud kini tungod sa madasigon ug aktibong partisipasyon sa mga miyembro ug coordinator sa CFC mission volunteer sa nagkadaiyang parokya sa Davao.

Sumala kang Paulo Naval, leader sa Youth for Christ – Reaching Out Christ through Kids (ROCK) kon ROCK, tumong niining aktibidad mao ang pag-ila sa Ginoo pinaagi sa upat ka Fs (FUN, FRIENDSHIP, FREEDOM ug FAITH).

Nakita gayud ang kalipay sa mga dagway sa mga bata ug mga kabatan-onan tungod kay gawas sa kasadya, nakahimamat pud sila ug mga bag-ong higala ug mas napalig-on pa ilang pagtuo sa Ginoo. Ang Kids for Christ gilangkuban sa 35 ka mga bata nga nagikan sa 17 ka GKK sa Talikud Island ug 46 ka batan-on sa Youth for Christ.

Dili lng kasadya ang nabati sa mga partisipante kundi ang paglambo sa ilang kaugalingon.

Nahuman ang aktibidad pinaagi sa recollection sa ginikanan ug ilang mga anak. Makita jud nga pursigido nga makatuon ang mga bata. Nanguli sila human sa paniudto nga puno sa kalipay ug gugma sa Ginoo. (Harince Malacura | SC Talicud SoCCom)