Nasudnong pagtugyan sa Pilipinas ngadto sa Putling Kasingkasing ni Maria

Niadtong Enero 2013 ang CBCP, nagdesisyon nga sa unang tuig sa novena alang sa 2021, nga ika-500 nga anibersaryo sa pagsugod sa Krisyanismo sa Pilipinas, himoon ang pagtugyan sa tibuok nasud sa Pilipinas ngadto sa Putling Kasingkasing ni Maria. Himoon kini sa adlaw sa iyang tinuig nga pangilin — ang Sabado human sa solemnidad sa Santos nga Kasingkasing ni Jesus. Pinanguluhan sa matag Obispo sa lugar, ug ang tanang Pari sa tanang simbahan sa lugar, maghiusa sa pagsaulog sa pangilin ni Birheng Maria. Sa maong Misa human sa pagkalawat sa mga magtotoo, maghiusa ang tanan sa pagtugyan sa nasud ngadto sa Putling Kasingkasing ni Maria.

Pinaagi niining tinuig ug hiniusang pagtugyan kang Birheng Maria, magmalig-on pa gayud ang mga magtotoo sa pagtininuod sa pagbag-o sa kaugalingon ug sa ilang kahimtang, tungod sa ilang pagsinati kang Kristo atong Ginoo. Gitoohan nato nga ang atong Mahal nga Inahang Maria maoy pinakadali, pinakasayon, ug pinakasiguradong paagi nga masinati nato’g pagayo ang Ginoong Jesus — ang bugtong manunubos sa kalibutan.

Ang gitinguha nato niining mga katuigan sa pagpangandam mao ang spiritohanong ug moral nga pagbag-o — ang pagbag-o sa hunahuna ug kasingkasing sa matag tawo subay sa dalan, kamatuoran, ug kinabuhi ni Kristo. Ug dili subay sa iyaha ning kalibutan. Mas lawom kini nga pagbag-o kay sa pagbag-o lamang sa struktura, balaod, tigdumala, pamagi. Kini tanan makatabang man, apan dili makausab sa galamhan diin nagagikan ug nagasukad ang tanang matang sa kadautan.

Sa atong pagtugyan sa Putling Kasingkasing ni Maria, atong ginabag-o ang atong panaad sa Bunyag nga mao ang pagsalikway sa sala ug patrol sa Dios. Sa ato pa, hiniusa natong gipahayag nga buot natong maghari ang Dios sa atong kinabuhi. Sa ingon, mahibalik ang katarong, kalinaw ug paghigugmaay sa tanan.

Nasayod kita nga ang katumanan niini dili lamang mag-agad sa buhat sa tawo nga walay pagtabang ug pagasalig sa Dios. Kinahanglan gayud nato ang kalooy sa Dios nga idugtong sa paningkamot sa tawo.

Busa, apil kitang tanan sa maong kasaulogan sa Pangilin sa Putling Kasingkasing ni Maria karong Hunyo 24, 2017. Pangulohan kini sa inyong Obispo ug mga kaparian. Human kita mangalawat, dungan natong itugyan ang atong nasud gikan Batanes hangtod Tawi-Tawi.

Apan dili igo ang tinuig nga pagtugyan. Ang labing importante mao nga matag adlaw gikan sa pagmata sa buntag ibalik sa panumduman ang gisaad ug bag-ohon aron matag adlaw lab-as kanunay ang maong tinguha. Kon makalimot, kon mapakyas, walay kaso. Sugod pagusab.

“Umari ka O Spirito Santo, umari ka pinaagi sa gamhanang pangamuyo sa Putling Kasingkasing ni Maria, ang imong pinalanggang esposo.”