Kung hain ang paghatag anaa ang kinabuhi

Solemnidad sa Balaang Lawas ug Dugo ni Kristo
Dt. 8:2-3, 14b-16a/ Sal. 147:12-15, 19-20/ 1 Cor. 10:16-17/ Jn. 6:51-58

Dunay duha ka managsuon. Ang usa minyo ug dunay daghang mga anak. Ang usa ulitawo ug walay pamilya. Ang igsuon nga dunay mga anak naghuna-huna nga nasayop ang ilang mga ginikanan sa pagbahin nga angay sa ilang katigayonan. Kay alang kaniya, naluoy siya sa iyang manghud nga walay pamilya, nag-inusara sa pag-ugmad sa iyang uma. Kung masakit walay moatiman kaniya. Maayo man kuno siya kay naa may mga anak man nga mosuporta. Usa ka mangitngit nga gabii sekreto niyang gihatdan didto sa kamalig sa iyang igsuon ug sako nga palay isip tabang niya. Gihimo niya kini sulod sa usa ka semana kada gabii. Apan natingala siya kay wala man makuhai ang iyang mga sinakong palay. Usa ka laing gabii, samtang naglukdo siya sa usa ka sako padulong sa kamalig sa iyang igsuon, nagbangga silang duha kay ang iyang igsuon naghuna-huna pud diay kaniya. Ang iyang igsuon naluoy pud nga daghan siya’g pakan-on nga mga anak, mao nga iyang gihatagan sa tago lamang ang iyang igsuon. Mao diay nga wala makuhai ang ilang mga sinako nga palay kay sila naghinatagay man.

Niining pagsaulog nato sa Solemnidad sa Balaang Lawas ug Dugo ni Kristo, gipasabot sa Ebanghelyo nga kita nakabaton sa kinabuhi tungod sa lawas ni Kristo nga gitugyan alang kanato ug sa iyang dugo nga giula alang kanato. Ang iyang lawas ug dugo dili ang materyal ug pisikal nga riyalidad kondili ang iya mismong kinabuhi, gipanudlo, ug gipuy-an nga pagpakiglambigit diha sa katilingban. Iyang gihatag ang tanan nga anaa niya aron kita mabuhi.

Ang pagdawat sa tanan nga iyang gihimo nga magpuyo nga katilingbanon maoy tuburan sa kinabuhi. Kini ang gipasabot diha sa ikaduhang pagbasa, ang pag-inambitay nga tinuoray. Pag-inambitay sa kasakit ug kalipay, kapakyasan ug kalampusan, kabuhong ug panginahanglan.

Malikayan unta nato ang pagbagulbol, kasina ug pagpatas-anay kondili hinumduman unta nato ang kaayo sa Ginoo nga kanunay naghatag kanato sa atong panginahanglan matud pa sa unang pagbasa. Ang paghinumdom sa kaayo sa Ginoo sukad kaniadto, ang Ginoo nga kanunay nag-atiman kanato, magtukmod unta sa matag-usa kanato sa pahuna-huna sa atong isigkatawo, ilabina sa nanginahanglan. Sama nga ang Dios kanunay naghatag kanato sa iyang kaugalingon, kita usab unta isip usa ka katilingban niining tuig sa parok isip kahiusahan sa mga katilingban, mag-inambitan, maghinatagay ug maghuna-huna alang sa kaayohan sa uban. Kay kung hain ang paghatag anaa ang kinabuhi.