Kapistahan sa GKK Sr. San Jose gisaulog

Malampusong gisaulog ang ika-12 nga kapistahan ni Sr. San Jose nga mamumuo sa GKK Remedios Heights, Cabantian nga nahisakop sa Parokya sa St. Mary of the Perpetual Rosary.

Gisugdan ang pagpangandam sa maong kapistahan pinaagi sa pre-fiesta general assembly una pa man magpista. Gitambongan kini sa mga GKK Servant Leaders ug miyembro sa katilingban kauban ang Parish Pastoral Team.

Sa maong assembliya gipahayag sa PSK nga si Merilyn Rollo ang mga nakalatid nga mga kalihukan sa pagsaulog sa kapistahan ni Sr. San Jose. Nagsugod ang novena Abril 22 hangtud Abril 30.

Bisan pa sa kakusog sa ulan panahon sa novena, daghan lang gihapon ang mitambong. Ang prusisyon napahitabo bisperas sa kapistahan alas 5:30 sa hapon. Gituyok ang imahen ni Sr. San Jose sa matag kalye sa maong katilingban dayon ang katapusang novena. Gisaulog ang Santos nga Misa niadtong Mayo 1, 2017 nga gipangulohan sa kura paroko nga si Fr. Jess Samaniego.

Mitambong ang mga miyembro sa katilingban ug mga bisita nga gikan sa silingan nga mga GKK sa kasaulogan, apil sab sa aktibidad nga gipangandaman sama sa Fiesta Zumba, basketball sa mga hamtong ug batan-on, ug mga padula alang sa mga kabataan isip pasidungog kang Sr. San Jose nga kanunay nagatabang aron sa kahiusahan sa katilingban. (Charmain Amplayo, GKK SoCCom | Hermie Mapute, SMPR Parish SoCCom)