Youth Camp sa Tagakpan

Nagmalampuson ang ika-14 nga JMY Summer Camp niadtong Mayo 19-20. Ang tinuig nga youth camp giorganisa sa JMY-PSB core group nga gipangulohan ni Frelyn Torreon, giniyahan ni Rev. Elly Capuno, Parochial Youth Director. Gisalmutan sa 200 kapin ka mga partisipante nga miyembro sa mga GKK sa parokya, ang tema mao: “Kabatan-onan nga nagkahiusa timaan sa aktibo ug buhi nga pagtoo diha sa parokya.”

Matud pa ni Frelyn, PSB president, giorganisa kining tinuig nga youth camp aron matapok ang mga kabatan-onan nga nag-gikan sa mga GKK nga maoy sumbanan sa paghiniusahay sa mga batan-on nga buhi ug aktibo ang pagtoo diha sa parokya.

Gisugdanang camp pinaagi sa pagsaulog sa santos nga misa nga gipangulohan ni Fr. Joseph V. Pasia, OSJ, ang Provincial Youth Director sa Oblates of Saint Joseph. Sa homiliya, gihatagan ug duot ni Fr. Joseph ang kabililhon sa panahiusa sa mga kabatan-onan. Sa ingon man, aron magkahiusa ang tanan, kinahanglan nga adunay gugma sa kasingkasing sa matag-usa.

“An unconditional love is the kind of love that Jesus wants us to learn from him. I hope [that] love will reign in this youth camp,” dugang ni Fr. Joseph.

Pagkahuman sa misa, nagparada ang mga kabataan dala-dala ang banners sa ilang tagsa-tag sa ka mga GKK. Dayon, gisugdan na ang managlahing aktibidades sa youth camp, sama sa ‘Getting to Know Each Other Activity’, Cheers and Yells, Inspirational Talk ni Fr. Joseph, Living Rosary, ug JMY Night.

Sa JMY Night, nagpasundayag ang mga kabatan-onan sa ilang mga talento. Highlight sa maong programa ang JMY Idol 2017, kung diin nalipay ug naninggit ang tanan sa pag cheer sa mga representative sa ilang mga zona.

Sa ikaduhang adlaw sa camp, nagpahigayon ug mga team building activities aron mapalambo pa ang kahiusahan sa mga campers. Gitapos ang youth camp pinaagi sa pagsaulog sa santos nga misa.

Makita gayud ang kalipay sa mga mata sa mga batan-on nga nisalmot sa youth camp, sama na lamang ni Trexie Rufin nga miingon “I’m so happy and thankful that I became a part of this activity. It was indeed a wonderful experience [because] I gained more friends, showed my talents and skills, and strengthened my connection with the Lord.”

Gibutyag usab ni Jessa Sayre, usa sa mga facilitator, nga nalipay jud siya kay nakita niya nga nalingaw ang mga batan-on, ug nga nakab-ot jud ang tumong sa camp nga hiusahon ang mga youth sa parokya diha sa pagdayeg ug pagserbisyo sa Ginoo.

Mapasalamaton ang tanan kay natapos ang youth camp nga malinawon ug puno sa grasya sa kahiusahan ug paghigugma. Nanguli ang tanan nga dala ang tanan nilang nakat-onan sa duha ka adlaw nga youth camp. (Jeffren P. Miguel | SFDA SoCCom)