“Kabatan-onan nga nagkahiusa, paglaum sa parokya”

Dakong panagtigom sa mga kabatan-onan ang gihimo sa parokya ni San Isidro Labrador sa Lumondao, Marilog District, Davao City niadtong Mayo. Ang summer youth camp nga gisalmutan sa kapin 499 ka mga batan-on gikan sa mga GKK nga sakop sa parokya higayon aron magkahiusa ang mga kabatan-onan sa ika-upat na ka tuig subay sa tema: “Kabatan-onan nga nagkahiusa, paglaum sa parokya.”

Sa laing bahin, natahasan si Sem. Marvin Del Campo gikan sa San Antonio De Padua Parish nga mugahin sa iyang kaalam ug talento diha sa pagpaambit ug mensahe ngadto sa mga batan-on. Sumala niya, ang batan-on ang paglaum diha sa atong komunidad ilabina gayud sa Simbahan.

Dugang pa niana, miingon usab siya nga angay sundon ang pagtulon-an ug himuong sumbanan si Kristo. “Kita dili gayud biyaan sa Dios bisan paman sa tanan natong kalapasan nga nahimo,” sumala niya. “Dakong hagit sa mga kabatan-onan karon ang aktibong pakiglambigit sa mga kalihukan sa Simbahan ug ilabina gayud nga mamahimong sentro si Kristo diha sa atong pagkinabuhi,” panapos sa guest speaker. (Jamaicah Suam | SILP-Lumondao SoCCom)