Ang Giyera batok sa sala

O Spirito Santo, umanhi ka. Bag-oha ang nawong sa yuta Malipayong Dominggo sa Pentekostes!

Niining panahon sa kasamok ug kagubot dinhi sa atong Mindanao, usa sa giawhag sa mga Obispo sa Mindanao labot sa maong kahimtang mao, ang PAGAMPO. Apan unsay ampoon? Kinsay ampoan?

Sa social media viral ang mga panawagan sa PAGAMPO alang sa mga sundalo. Ang nga sundalo nakodakan nga nagaampo. Ang mga terrorista apil ba nga iampo? Nagaampo pod ba sila? Unsa kahay ginaampo nila?

Sa mensahe sa Birhen sa Fatima alang sa kalinaw, makat-onan nato ang kahulugan niining PAGAMPO alang sa kalinaw nga mapuslanon ug mabungahon. Dili lang diay ni siya mga debosyon sa mga alampoon sama sa pagrosaryo matag adlaw, ang debosyon sa 5 ka primerong Sabado sa bulan, ubp.

Iampo mo kaming makasasala
Ang unang lakang sa pagkab-ot sa kalinaw mao ang pag-ila ug pagdawat nga ang SÀLA sa tawo maoy ugat sukaranan sa kagubot ug kasamok, giyera tali sa mga tawo. Ang SÀLA sa tawo nagdala kaniya sa kapintas nga nagdalag dakong kasakit ug kasubo sa tawo. Busa, ang SÀLA kinahanglan, una sa tanan, isalikway, ipangayog pasaylo, sakripisyohan aron mahiuli ang kaayo ug katarong.

Tinuod nga dunay gitawag nga – failure of intelligence. Failure sa law enforcement. Failure of governance. Failure of justice system. Failure of public service. Failure of politicians. Failure of education. Failure of religious institutions. Ug lain pang uban. Apan hangtod dili nato ilhon ang ugat sukàranan, bisan pa MARTIAL LAW, dili makakab-ot og makatrunganon ug malungtarong kalinaw. Kinahanglan ang lawom nga pagsusi sa ugat sa kahimtang – ang tawo nagmasinupakon sa dalan, kamatuoran ug kinabuhi sa Dios.

Ang pagrosaryo matag adlaw instrumento lamang nga gitudlo ug gipangayo sa Birhen sa Fatima sa mga tawo aron motabang kanato sa inanay nga pag-amgo, pagkaplag, pagasabot sa dakong kadaot nga epekto sa SALA. Ug madani nga magbag-o sa kinabuhi. Maluwas siya gikan sa kangitngit sa kadautan, ngadto sa kahayag sa kaayo ug katarong.

Iampo ang mga makasasala
Tungod kay and mga makasasala maoy hinungdan sa kahimtang sa kasakit bunga sa kasamok ug kagubot, ang Birhen sa Fatima, aron pagtabang sa pagluwas sa maong kahimtang gipangayo sa tanan nga magampo ug magsakripisyo alang sa kalingkawasan sa mga makasasala, una sa tanan, ang kaugalingon. Ug sunod ang labing nanginahanglan sa kalooy ug panabang sa Dios kay nagapos sila sa garbo, kahakog, pagkabuta ug pàgkabungol sa kasakit sa uban – ang mga kriminal, mga sindikato sa illegal nga droga, sa mga kawatan ug tikasan sa kagamhanan, ang mga terorista, ang mga sindikato sa human trafficking, ang mga mananapaw, ang mga rebelde nga nagpahimulos sa kàtawhàn, mga pulis ug militar nga nagdaogdaog sa katawhan ug lain pang uban.

“O Jesus ko, pasayloa kami sa among mga sala. Luwasa kami sa kalayo sa impiyerno. Ug dad-a kaming tanan sa langit, ilabi na ang mga nanginahanglan sa imong kalooy ug panabang.”

Pagbalik sa Dios
Ang sala dili iya sa Dios. Ang kasamok , kagubot , ug giyera dili usab iya sa Dios. Busa ang kasulbaran niini mao ang pagbalik sa tawo ngadto sa dalan, kamatuoran ug kinabuhi sa Dios. Kini ang gitinguha sa Birhen sa Fatima alang sa tanang katawhan kaniadto pa ug hangtod karon sa ika-3 nga millenyo. Labi pa ganing gikinahanglan kining dalan sa kalinaw karon taliwala sa kalibutan nga anaa na dakong peligro sa hilabihang dakong katalagman tungod sa padayon nga pagsupak sa Dios.