Katilingban nga nagkahiusa, kinabuhi nga malinawon

Solemnidad sa Santisima Trinidad
Ex. 34:4b-6, 8-9/ 2 Cor. 13:11-13/ Jn. 3:16-18

Gisaulog sa tibuok Simbahan sa kalibutan karon ang Solemnidad sa Santisima Trinidad kon usa ka Dios sa tulo ka persona. Gisaulog usab sa mga magtotoo sa nasud nga Pilipinhon karon ang adlaw sa Parokya isip kahiusahan sa mga katilingban.

Tataw kaayo nga ang Dios Amahan, ug Anak ug Espiritu Santo ang unang katilingban. Ang Dios Amahan nagpadayag sa tanang katawhan pinaagi sa pagpakatawo sa iyang bugtong Anak pinaagi sa gahum sa Espiritu Santo. Kining pagpadayag tinukmod sa dakung gugma nga dili maghukom sa makasasala nga katawhan kondili aron pagluwas sa tanan. Ang gugma sa Dios Amahan nga gipakita pinaagi sa pagpuyo sa Anak ug paghatag sa gasa sa Espiritu Santo sa tibuok kalibutan maoy tataw nga timaan nga ang Dios nga katilingban sa tulo ka persona buot makighiusa kanunay sa iyang mga binuhat, ang katawhan.

Gitubag sa Dios ang pag-ampo ni Moises sa unang pagbasa nga bisan sa kagahi sa ilang ulo, naghangyo si Moises nga mopuyo unta ang Ginoo uban sa katawhan. Bisan pa man sa pagkapakyas sa pagsunod sa iyang balaod, ang Dios mopasaylo ug makig-uban sa iyang mga minahal nga pinili.

Kining maong pakighiusa sa pagpuyo sa Dios uban sa iyang katawhan, lig-onon sa gasa sa Espiritu Santo. Mao kini ang maghatag ug gahom sa iyang katawhan aron sila magmabination ug mag-inambitay diha sa kalinaw.

Ato kahang maangkon ang kalinaw human sa kagubot didto sa Marawi nga nahimong hagit atubangan sa mga Kristiyano, Muslim ug Lumad? Unsa kahay atong mahimo aron ang Martial Law sa Mindanaw maghatod kanato sa tinuod nga panaghiusa ug pagsinabtanay ug dili kahadlok ug abuso? Mahimo ba nga ang katilingbang malinawon masugdan nato sa tiunay nga pagkamanagsuon dinhi sa atong GKK ug sa tagsa-tagsa nato ka mga pamilya?

Iampo nato nga ang panag-ambitay sa Santisima Trinidad taliwala sa ilang panaglahi mao unta ang atong maangkon. Iampo nato nga ang kalinaw nga magdala sa tinuod nga kahiusa maglig-on unta sa tagsa-tagsa nato ka mga parokya.