Kabag-ohan, kusog, kalinaw

Pentekostes
Buhat 2:1-11/ Sal. 104:1, 24, 29-30, 31, 34/ 1 Cor. 12:3-7, 12-13 or Rom. 8:8-17/ Jn. 20:19-23 or Jn. 14:15-16, 23-26

Nakasinati ka na ba sa Espiritu Santo? Nailhan mo ba ang Espiritu Santo?

Ang unang timailhan sa pagkunsad sa Espiritu Santo mahulagway sama sa kalayo. Kining maong kalayo naghatod sa mga magtotoo sa kabag-ohan gikan sa kahadlok ngadto sa kaisog ug sa panaghiusa. Kining maong kalayo nakapabag-o sa matag-usa ka magtotoo gikan sa pagtagu tungod sa kahadlok ngadto sa kadasig sa pagsangyaw sa kamatuoran sa pagkabanhaw ni Kristo. Mapuy-an kaha nato ang katilingbang madasigon nga nag-ambit sa Maayong Balita? Madasigon ba kita diha sa atong mga kasaulogan, sa atong mga kalihukan ug sa matag-adlaw nga pagkinabuhi?

Ikaduha, masuta ang presensiya sa Espiritu Santo diha sa simbolo sa tudlo. Sa mga litrato usahay makita nato ang tudlo sa Ginoo nga naghatag kusog sa tawo nga walay kinabuhi ug nagluya. Ang tudlo sa Ginoo tuburan sa kalig-on ug kinabuhi. Kining maong kusog maangkon kung taliwala sa nagkadaiya nga gigikanan, ang matag-usa nag-inambitay ug nagtinabangay. Ang panaglahi nga taras, pagsabut, mga gasa ug abilidad maghatag sa hiniusang kusog sa mga tawo nga nakadawat sa maong Espiritu. Nahiusa ba kita sa mao ra nga tumong sa pagbalaan sa atong palibot taliwala sa atong pagkamanaglahi?

Ikatulong ilhanan aron kita makaingon nga ang Espirtu Santo buhi diay mao ang kalinaw nga gisimbolo sa salampati. Human sa dakong baha panahon ni Noeh, ang paglupad sa salampati nagtimaan sa kalinaw ug kahapsay nga mibalik na sa kalibutan. Mao kini nga si Hesus mipasalig sa iyang mga tinun-an diha sa Ebanghelyo sa gasa sa kalinaw. Dala kini sa mapadayunon nga presensiya ni Kristo niining kalibutan kay Siya man ang Prinsepe sa kalinaw. Nituhop na ba ang kalinaw nga gikan gayod sa tagsa-tagsa nato ka kasing-kasing aron kini atong mapaambit sa uban?

Sa paghandum nato sa Pentekostes karong adlawa, ang gisaysay nga kabag-ohan, kusog ug kalinaw diha sa atong mga pagbasa, ato untang masinati. Isip mga magtotoo sa nabanhaw nga Kristo, mamahimo unta kitang mga buhing timaan sa presensiya sa Espiritu Santo pinaagi sa kanunay natong pagpaningkamot sa kabag-ohan, kusog ug kalinaw. (Rev. Fr. Jeus Jardin, DCD)