Bugtong Anak sa Dios

P: Unsaon man pagsabot nga si Jesus mao ang Bugtong Anak sa Dios?

T: Si Jesus mao ang Anak sa Dios sa talagsaon ug sa hingpit nga paagi. Sa panahon sa Iyang Pagbunyag ug sa Pagkausab sa iyang Panagway, ang tingog sa Amahan mitudlo kang Jesus nga iyang “pinalangga nga anak”. Sa pagpahayag niya sa iyang kaugalingon isip Anak nga “nakaila sa Amahan” (Mt. 11:27), gipamatud-an ni Jesus ang iyang usa ra gayod ug walay kinutoban nga relasyon sa Dios nga iyang Amahan. Siya “ang Bugtong Anak sa Dios (1 Juan 4:9), ang ikaduha nga Persona sa Santisima Trinidad. Siya ang kinataliwad-an nga larawan sa apostolikanhong pagwali. Nakita sa mga apostoles “ang iyang himaya ingon nga bugtong Anak sa Amahan” (Juan 1:14).

P: Unsa man ang kahulogan sa titolo nga “Ginoo”?

T: Sa Bibliya, kini nga titolo sagad nagpunting sa Dios nga Labaw-sa-tanan. Giangkon ni Jesus kining mao nga titolo ug gipadayag niya ang iyang diosnon nga pagkalabaw-sa-tanan pinaagi sa iyang gahom ibabaw sa kinaiyahan, ibabaw sa mga demonyo, ibabaw sa sala, ug ibabaw sa kamatayon, labaw sa tanan pinaagi sa iyang kaugalingong Pagkabanhaw. Ang mga unang Kristohanong Credo nagasangyaw nga ang gahom, ang dungog, ug ang himaya nga angay sa Dios nga Amahan iya usab ni Jesus: “gihatagan siyag ngalan nga labaw sa tanang ngalan” (Fil. 2:9). Siya ang Ginoo sa kalibotan ug sa kasaysayan, ang Usa lamang sa kang kinsa kinahanglan ng hingpit itugyan nato ang atong personal nga kagawasan.

P: Nganong nahimo man nga Tawo ang Anak sa Dios?

T: Alang kanatong mga tawo ug alang sa atong kaluwasan, (ang Anak sa Dios nahimong Tawo sa tiyan ni Birhen Maria sa lalang sa Espiritu Santo. Iya kining gihimo aron mahiuli kitang mga makasasala ngadto sa Dios, aron kita makat-on sa walay-kinutobang gugma sa Dios, aron siya mahimong sumbanan nato sa pagkabalaan ug aron kita “makaambit sa diosnong kinaiya” (2 Pedro 1:4).

(Kompendiyo Sa Katekismo Sa Simbahang Katoliko, 83-85)