Theater Arts Workshop gihimo sa Panacan

Nagpahigayon ug usa ka Summer Theater Arts Workshop ang mga kabatan-onan sa San Miguel Parish, parokya sa Panacan ning dakbayan sa Davao aron matabangan ang mga kabatan-onan nga mamahimong produktibo ang ilang bakasyon karong summer.

Kini gisugdan kaniadtong Abril 23 ug mapadayonon tibuok bulan sa Mayo. Kini gipangunahan sa mga Pangulo sa Batan-on sa Parokya nga gidumala ni Alma Nina Olaer, ang Parish Youth Coordinator pinaagi sa suporta sa Kura Paroko nga si Rev. Fr. Proceso Gimeno Jr.

Gisaysay ni Olaer ang iyang panglantaw nga matabangan ang mga kabatan-onan ug nga dili masayang ang ilang bakasyon ug sila mamahimong produktibo kini. Gidugang pud niya nga, “among ipadayon kini tibuok bulan sa Mayo ug p’wede pud na magpadayon kini bisan hangtud Hunyo kung gikinahanglan.”

Giawhag usab ni Ana Rose Toralde, usa ka magtutudlo ug kasamtangang PSB nga himuong produktibo ang bakasyon sa mga kabatan-onan ug dili kini usikan sama sa pagdula lamang ug dota ug uban pa.

Si Sir Ryan Calsa nag-aghat sa tanang batan-on labi na sa mga batan-on nga lumulupyo sa Panacan ug sakop sa San Miguel Parish nga aron mamahimong produktibo ang maong bakasyon, mag-apil kita sa pagahimuon nga mga summer youth camp. Iya pud giimbitahan ang tanan sa pagahimuon nga Summer Youth Camp karong bulan sa Mayo.

Gilauman sa mga Pangulo sa Batan-on nga naglihok sa parokya nga kini pagatubagon sa mga batan-on ug dili lamang baliwalaon. (Rusty Salazar Corsame | SMP SoCCom)