Pari: Pagpaubos diha sa pagbuhat sa kalooy

Atol sa misa sa Holy Family Parish, si Fr. Ricky Peñalosa, ang kura-paroko, naghagit sa tanang mga parokyano nga puy-an ang mensahe sa pagkabanhaw. Matod pa niya dili lamang kita makontento sa pagtambong sa mga selebrasyon panahon sa kwaresma. Siya naghagit sa tanan nga isangyaw ang mensahe sa pagkabanhaw pinaagi sa buhat nga makalipay sa Dios. Dugang pa niya, isip mga binunyagang Katoliko, dili kita makontento sa pagsimba lamang matag-Dominggo ug panahon sa birthday apan kita makiglambigit sa mga kalihukan sa simbahan.

Iyang gisaysay ang nagkalahi-lahing organisasyon sa parokya nga mahimong apilan sama sa Knights of Columbus, choir, lectors and commentators, Knights of the Altar, Gift Bearers, CWL, DMI, Couples for Christ, Adoracion Nocturna, EMC ug daghan pa.

Ania ang unod sa iyang mensahe: “Sa sulod sa 40 ka adlaw, kita gihatag ug igong higayon sa pagpangandam aron saulugon ang Semana Santa, panahon nga gigahin sa simbahan sa paghinumdom sa pagpakasakit ug sakripisyo sa atong Ginoong si Jesucristo.

Niadtong Huwebes Santo, gipadayag kanato ang matinud-anong pagsilbi sa atong isig kaingon. Sama ni Hesus, kita adunay daghang higayon sa pagserbisyo sa uban pinaagi sa nagkalain-laing buhat sa kaluoy, apan ang labing importante sa tanan ang pagbuhat sa ingon sa dakong pagpaubos nga maoy simbolo sa paghugas ni Hesus sa tiil sa mga tinun-an.

Biyernes Santo, pinakamasulob-ong adlaw sa Simbahang Katoliko. Gipamalandungan nato ang pinakapait nga kaagi sa kinabuhi ni Hesus. Gani nikuyog kita kaniya sa pagbaktas sa kadalanan aron kita usab makatagamtam sa iyang kaagi. Atong gipamati ang iyang 7 ka ulahing pulong bag o siya nabugtuan sa gininhawa. Nasubo kitang tanan sa iyang kamatayan nga usa ra ang hinungdan, ang dakong guma niya nganhi kanato. Nakabaton kita ug kalipay tungod sa iyang gugma ngari kanato. Puno kita sa kaguol apan malipayong nagpasalamat kaniya sa tumang sakripisyo ng iyang gibuhat aron kita maluwas sa atong mga sala. Ug sama sa iyang gisulti nga sa ika-3 adlaw siya mabuhi pag-usab, ato kining gisugat nga malipayon duyog sa mga awit sa mga anghel. Kita nisinggit ug kusog,nagdayeg sa himaya sa Dios.

Apan unsa may kahulugan sa atong pagselebrar sa pagkabanhaw ni Hesus? Igo na ba ang pagngisi sa atong mga katupad sa simbahan samtang mutimbaya ug “Happy Easter!”? Sa Domingo sa Pagkabanhaw, murag nag-awas-awas ang atong kalipay, hilabihan ang atong paghudyaka. Nindot nga kasinatian sa Pagkabanhaw! Apan, hangtod asa kutob ang atong paghandom sa Pagkabanhaw?”

Si Fr. Ricky nanghinaot nga isip binunyagang Katoliko kita magpadayon sa pagsangyaw sa mensahe sa pagkabanhaw — papaambit sa atong panahon, grasya ug talento sa atong katilingban isip atong gasa sa Dios. Sa katapusan, kini iyang hagit sa iyang mga parokyano, “Unsay plano nimo sa pagkabanhaw ni Hesus?” (Flor Deloria | HFP SoCCom)