Blood letting gipahigayon sa Buhangin, Agdao nanawagan ug donors

Katulo sa usa ka tuig nagapahigayon og Mobile Blood Donation (MBD) kon Blood Letting ang St. Mary of the Perpetual Rosary Parish sa Buhangin ubos sa pakig alayon sa Department of Health – Davao Blood Center.

Subay sa tema, “Pakighiusa sa Parokya Pinaagi sa Pagdonate og Dugo” ug sa sub-theme nga nagkanayon: “Dugo Mo Kinabuhi Ko,” ang Mobile Blood Donation usa sa mga regular nga programa nga nakalatid sa tinuig nga Plano sa Parish Social Action Ministry (PSAM) nga gipangulohan sa PSAM coordinator, Joel Corage pinaagi sa pag aproba ug suporta sa Kura Paroko, Fr. Jess Samaniego. Karong tuiga napahigayon ang unang MBD niadtong Pebrero 26.

Matud pa ni Elizabeth Sabucido, MBD parish coordinator, 195 ang nagpalista nga modonate og dugo; 171 niini ang aktwal nga nakuhaan.

Hinayhinay nang nasabtan sa mga parokyano ilabi na sa mga donor ang ka importante niini. Ang timailhan mao nga aduna nay duha (2) ka parokyano ang naka donar na og duha ka galon nga dugo ug adunay biente otso (28) ang gitawag nga blood galloners.

Nagmalampuson ang maong kalihukan pinaagi sa pakigtambayayong sa mga GKK Servant Leaders diha sa matag GKK ilabina sa Caritas, PSA volunteers ug Blood Donors.

Sa pikas bahin, ang gugma ug pag-alagad. Mao kini ang buot puy-an sa mga taga San Antonio Parish, Agdao.

Imbitado ang buot mo-donate sa Bloodletting nga pagahimoon sa St. Mary’s Parish Hall, likod sa parokya sa Agdao karong Marso 26, alas 6 sa buntag.

Matud pa, usa kini ka pamaagi sa pagsunod sa lakang ni Kristo karong panahon sa Kwaresma. Ang kamatuoran sa pag-alagad sa katawhan sa Dios masumada diha sa gibilin nga sugo ni Kristo sa tanan Niyang sumusunod: “Higugmaa ang imong isigkatawo sama sa imong paghigugma sa imong kaugalingon.” Ang pag-alagad sa uban repleksyon sa gugma sa tawo sa isig-kaingon. Ang paghatag sa imong kaugalingong dugo alang sa tawo nga nanginahanglan niini, usa ka dakong pag-alagad alang sa uban. (Hermie Mapute | Elena Corazon Mozo | SoCCom)