Pulong 40 sa Balaang Kasulatan

Ang pulong ‘kwaresma’ gikan sa kinatsila nga pulong nga nagpasabot ug 40 ka adlaw. Ang numero nga 40 diha sa Bibliya nagkahulogan ug kadaugan sa mga saad sa Diyos diha sa iyang katawhan. Atong mabasa diha sa Genesis 7:17 nga ang lunop milungtad ug 40 ka adlaw human niana misaad sa Diyos nga dili na niya usbon ang lunop.

Diha sa Exodo 34:28, si Moises nag andam nag ampo didto sa bukid sa Sinai sulod sa 40 ka adlaw ug gabie nagpuasa human niana, gihatag sa Dios ang 10 ka sugo. Sa 1 Hari 19:8 si Propeta Elias naglakaw 40 ka adlaw ug gabie padulong sa bukid sa Horeb.

Sa panahon ug bag-ong tugon, ang atong Ginoo nagpuasa ug nagdili sa pagkaon sulod sa 40 ka adlaw ug gabie agi’g pagpangandam sa iyang ministriya. Didto gitintal ang Ginoo apan nagmadaugon siya batok sa yawa ug tentasyon (Mt. 4:2). Ingon man usab sa atong pagpangandam karong kwaresma, patyon ta ang atong mga sobrang kalibutanong pangandoy ug ipunting nato ang huna-huna sa mga butang nga molungtad hangtud sa kahangturan (2 Cor.4:18) (Ryan Mejillano, MAT, Sub Umbra Petri, 8-9 PM, “Giya sa Pagtoo”)